قازاقستاندا جاڭا پارتيالار پايدا بولادى - قاسىم-جومارت توقايەۆ
13:29, 29 - ءساۋىر 2022
نۇر-سۇلتان. قازاقپارات - پارتيالىق جۇيە رەفورماسى سايلاۋ پروتسەستەرىنە بارلىق ازاماتتىڭ قاتىسۋىنا جاڭا مۇمكىندىكتەر اشادى.
بۇل تۋرالى قازاقستان حالقى اسسامبلەياسىنىڭ كەزەكتى وتىز ءبىرىنشى سەسسياسىندا پرەزيدەنت قاسىم-جومارت توقايەۆ ءمالىم ەتتى، دەپ حابارلايدى قازاقپارات ءتىلشىسى.
«پارتيالىق جانە سايلاۋ جۇيەسىنىڭ رەفورماسى سايلاۋ پروتسەستەرىنە بارلىق ازاماتتىڭ قاتىسۋى ءۇشىن جاڭا مۇمكىندىكتەر اشادى. بارشا ەلەكتورالدى لاندشافتتى قامتيتىن جاڭا پارتيالاردىڭ پايدا بولۋى بولجانىپ وتىر. پارتيا تىزىمدەرى، سونداي-اق ءبىر مانداتتى وكرۋگتار بويىنشا كانديداتتاردى سايلاۋ قازاقستاننىڭ ەتنيكالىق ءارالۋاندىعىن ناقتى كورسەتەدى دەپ سەنەمىن»، - دەدى قاسىم- جومارت توقايەۆ.
سونىمەن قاتار پرەزيدەنت ەتنيكاارالىق فاكتوردى ساياسيلاندىرۋعا، بۇل تاقىرىپتا زالالدى ءارى ارانداتۋ پىكىرتالاستارىنا جول بەرمەۋ كەرەك ەكەنىن اتاپ ءوتتى.
اۆتور: رۋسلان عابباسوۆ