ب ۇ ۇ باس حاتشىسى ۆ. زەلەنسكيمەن كەزدەستى

نۇر-سۇلتان. قازاقپارات - بىرىككەن ۇلتتار ۇيىمىنىڭ باس حاتشىسى ماسكەۋدەن كەيىن كيەۆكە باردى. وندا انتونيۋ گۋتەرريش ۋكراينا پرەزيدەنتىمەن كەزدەستى.

باس حاتشى ۋكراينا قازىر جان توزگىسىز وقيعالار مەن قايعى-قاسىرەتتىڭ ناق ورتاسىندا تۇرعانىن مالىمدەدى، دەپ حابارلايدى «حابار 24».

سونداي-اق گۋتەرريش بىرىككەن ۇلتتار ۇيىمى بەيبىتشىلىك ورناتۋ ءۇشىن بارىن سالاتىنىن جەتكىزدى. ول ۋكراينادا ادام قۇقىقتارىنىڭ اياق استى تاپتالعانىنا جانە ءتىپتى سوعىس جۇرگىزۋ ەرەجەلەرىنىڭ ورەسكەل بۇزىلعانىنان كۋا بولعانىن ايتتى.

«قازىر ۋكراينادا بىرىككەن ۇلتتار ۇيىمىنىڭ 1400 قىزمەتكەرى جۇمىس ىستەپ جاتىر. ولار 9 جەدەل ارەكەت ەتۋ ورتالىقتارىندا جانە 30 بەكەتتە ورنالاسقان. حالىقارالىق قاۋىمداستىق وسى ساتكە دەيىن ۋكراينا ىشىندە 3 ميلليون 400 مىڭ تۇرعىنعا گۋمانيتارلىق كومەك كورسەتتى. تامىز ايىنىڭ اياعىنا دەيىن بۇل سان 2 ەسە ارتىپ، 8 ميلليون 700 مىڭ ادامعا جەتۋى كەرەك. جىل سوڭىنا دەيىن گۋمانيتارلىق كومەككە مۇقتاج كىسىلەر سانى 25 ميلليونعا جۋىقتاۋى مۇمكىن. بۇل سوعىس تەز ارادا توقتاتىلىپ، بىرىككەن ۇلتتار ۇيىمىنىڭ جارعىسىنا سايكەس بەيبىتشىلىك سالتانات قۇرۋى ءتيىس»، - دەيدى ب ۇ ۇ باس حاتشىسى انتونيۋ گۋتەرريش.

ۋكراينا پرەزيدەنتى ءوز كەزەگىندە بىرىككەن ۇلتتار ۇيىمى ماريۋپول قالاسىنىڭ «ازوۆستال» زاۋىتىندا قورشاۋدا تۇرعان ساربازدار مەن بەيبىت تۇرعىنداردى امان-ەسەن قۇتقارۋعا كومەكتەسەر دەگەن سەنىمىن جەتكىزدى. سونداي-اق ۆلاديمير زەلەنسكي ۋكراينانىڭ وڭتۇستىك- شىعىس ايماقتارىندا رەسەي تۇرتكى بولعان رەفەرەندۋمداردى ەشقاشان زاڭدى دەپ مويىندامايتىنىن ەسكەرتتى.

«مۇنداي جالعان رەفەرەندۋمدار كوبەيۋى مۇمكىن. وكىنىشكە قاراي، سوعىس باستالعان كەزدەگى جاعدايعا، قىرىم ماسەلەسىنە قاراساق، ءىس جۇزىندە نە بولىپ جاتقانىن كورىپ، كوڭىل قۇلازيدى. ءبىراق ۋكراينا دا، بۇكىل وركەنيەتتى الەم دە مۇنداي رەفەرەندۋمداردى مويىندامايدى»، - دەيدى ۋكراينا پرەزيدەنتى ۆلاديمير زەلەنسكي.