قازاقستانداعى بۇكىل ۇلتتاردىڭ بولاشاقتا قازاق تىلىندە سويلەۋىنە جاعداي جاسالدى
بۇل تۋرالى حالىقتىڭ تابىسىن ارتتىرۋ باعدارلاماسىن تانىستىرعان ق ر پرەمەر-ءمينيسترىنىڭ ورىنباسارى ەرالى توعجانوۆ ايتتى، دەپ حابارلايدى قازاقپارات ءتىلشىسى.
«قازاق ءتىلىنىڭ مەملەكەتتىك ءتىل ەكەنىنە ەشكىمنىڭ ەشقانداي كۇمانى جوق. بۇگىندە ءوزىمىزدىڭ انا تىلىمىزدە سويلەۋگە ەشقانداي كەدەرگى جوق. ۇكىمەت وتىرىستارىنىڭ ءبارى قازاق تىلىندە جۇرەتىنىن ەل بىلەدى. سوندىقتان ونى ارى قاراي دامىتۋ ءار قازاقتىڭ قولىنداعى، موينىنداعى پارىزى دەسەم، ارتىق ايتقاندىق ەمەس دەپ ويلايمىن. قازىر قازاقستاندا تۇرعىنداردىڭ 70 پايىزى قازاق تىلىندە سويلەيدى. ءبىراق، ونى ارى قاراي دامىتۋىمىز كەرەك. توقمەيىلسىپ وتىرۋعا ەشكىمنىڭ قاقىسى جوق. اسىرەسە، مەكتەپ، كوللەدج، جوعارى وقۋ ورىندارى دەڭگەيىندە بۇل ماسەلەنى دامىتۋىمىز قاجەت»، - دەدى ۇكىمەت باسشىسىنىڭ ورىنباسارى ورتالىق كوممۋنيكاتسيالار قىزمەتىندەگى باسپا ءسوز ءماسليحاتىندا ب ا ق وكىلدەرىنىڭ ساۋالىنا وراي.
ونىڭ دەرەگىنشە، ەلىمىزدەگى مەكتەپتەردىڭ 70 پايىزىنان استامى قازاق تىلىندە ساباق بەرەدى. «بۇل ۇلكەن جوبالاردىڭ ءبىرى. ءبىراق، بۇل ساياسيلاندىراتىن سۇراق ەمەس. ءتىل ماسەلەسى مادەنيەت جانە سپورت مينيسترلىگىنەن ءبىلىم جانە عىلىم مينيسترلىگىنە بەرىلدى. ءبىلىم سالاسىنا بەرىلدى دەگەنىمىز، ءتىل وقىتۋدىڭ ناقتى ادىستەمەسىن جەتىلدىرە وتىرىپ، ءاربىر قازاق بالاسىنا، قازاقتىڭ ساناسىنا ءسىڭىرۋ كەرەك. قازاقستاندا تۇراتىن بۇكىل ۇلتتاردىڭ بولاشاقتا مەملەكەتتىك تىلدە سويلەۋىنە جاعداي جاسالدى. ءبىراق، جۇزەگە اسىرۋ ءبارىمىزدىڭ موينىمىزدا»، - دەدى ەرالى توعجانوۆ.
اۆتور: مارلان جيەمباي