مۇناي مەن گازدىڭ ستراتەگيالىق قورىن قالىپتاستىرۋ قاجەت – سەناتور
بۇل تۋرالى بۇگىن سەناتتاعى ۇكىمەت ساعاتىندا سەناتور ەرىك سۇلتانوۆ ايتتى، دەپ حابارلايدى قازاقپارات ءتىلشىسى.
«سارىارقا» ماگيسترالدىق گاز قۇبىرى قۇرىلىسىنىڭ باياۋ قارقىنىن ەسكەرە وتىرىپ، 2025 -جىلعا قاراي بۇرىن جوسپارلانعانداي، سولتۇستىك جانە شىعىس وڭىرلەردى گازداندىرۋدى اياقتاۋ مۇمكىن بولمايتىنى انىق. بۇگىنگى تاڭدا گازدىڭ بولماۋى ينۆەستيتسيالار تارتۋ، جاڭا وندىرىستەر قۇرۋ، حالىقتى جۇمىسپەن قامتۋ جانە وڭىرلەر مەن تۇتاستاي ەلدىڭ ەكونوميكاسىن دامىتۋ ءۇشىن باستى تەجەۋشى فاكتورلاردىڭ ءبىرى بولىپ وتىر. سوندىقتان، قالىپتاسقان اعىمداعى جاعدايدى ەسكەرىپ، ۇلتتىق جانە ەكونوميكالىق قاۋىپسىزدىكتى قامتاماسىز ەتەتىن وڭىرلەردى گازداندىرۋدىڭ قولايلى نۇسقاسىن كوزدەۋ ۇسىنىلادى»، - دەدى ول.
سونىمەن قاتار سەناتور ەلدىڭ سولتۇستىك جانە شىعىس وبلىستارىن رەسەي فەدەراتسياسىنىڭ يشيم جانە بارناۋل قالالارىنان گازداندىرۋ بويىنشا بۇرىن پىسىقتالعان جوبالاردى قايتا قاراۋ كەرەكتىگىن العا تارتتى.
«وسى ماسەلەلەردىڭ بارلىعىن گاز سالاسىن دامىتۋدىڭ 2030 -جىلعا دەيىنگى كەشەندى جوسپارىندا كورسەتۋدى ۇسىنامىز، سايكەسىنشە ونى بەكىتۋدى جەدەلدەتۋ قاجەت. سونداي- اق الەمنىڭ كوپتەگەن ەلدەرى سياقتى جەكە نورماتيۆتىك قۇجات قابىلداۋ ارقىلى مۇناي مەن گازدىڭ ستراتەگيالىق قورىن قالىپتاستىرۋ قاجەت. مۇنداي شارا ەلدىڭ ەنەرگەتيكالىق قاۋىپسىزدىگىنىڭ ىرگەتاسى، ىقتيمال ەكونوميكالىق قيىندىقتار جاعدايىندا قورعانىس تەتىگى بولادى»، - دەدى ەرىك سۇلتانوۆ.