قورعانىس مينيسترلىگى اسكەري پارادتىڭ نە ءۇشىن وتپەيتىنىن ءتۇسىندىردى

نۇر-سۇلتان. قازاقپارات - ق ر قورعانىس مينيسترلىگى بيىل جەڭىس كۇنىنە ارنالعان اسكەري پارادتىڭ نە ءۇشىن وتكىزىلمەيتىنىن ءتۇسىندىردى، دەپ حابارلايدى قازاقپارات.

«2022 -جىلى قازاقستاندا اسكەري شەرۋ وتكىزۋ بيۋدجەت قاراجاتىن ۇنەمدەۋ ءۇشىن، سونداي-اق باسقا دا مىندەتتەردى شەشۋ قاجەتتىگىنە بايلانىستى جوسپارلانباعان. اتاپ ايتقاندا، قازاقستان قارۋلى كۇشتەرى بولىمشەلەرىنىڭ جاۋىنگەرلىك ازىرلىگى مەن ۇتقىرلىعىنىڭ قاجەتتى دەڭگەيىنە قولداۋ كورسەتۋ، مەملەكەتتىك جانە اسكەري نىسانداردى كۇزەتۋ مەن قورعاۋدى قامتاماسىز ەتۋ جونىندەگى مىندەتتەردى ورىنداۋعا باسىمدىق بەرىلەدى»، - دەپ جاۋاپ بەردى قورعانىس مينيسترلىگىنىڭ باسپا ءسوز قىزمەتى.

بۇعان دەيىن قورعانىس مينيسترلىگى 2022 -جىلى قازاقستان رەسپۋبليكاسى قارۋلى كۇشتەرىنىڭ قۇرىلعانىنا 30 جىل تولۋىنا جانە 1941-1945 -جىلدارداعى ۇلى وتان سوعىسىنداعى جەڭىس كۇنىنە ارنالعان اسكەري پارادتىڭ وتپەيتىنىن حابارلاعان ەدى.

دەگەنمەن، مەرەكەگە وراي اسكەري-پاتريوتتىق ءىس-شارالار وتكىزۋ جوسپارلانعان.

اۆتور: ايجان سەرىكجان قىزى