قازاقستان عىلىمىن دامىتۋدىڭ بەس جىلدىق تۇجىرىمداماسى قابىلدانادى
ۇكىمەت باسشىسى عىلىم مەن بيزنەس تىعىز بايلانىستا بولعاندا عانا ءوندىرىس دامىپ، حالىققا ناقتى پايدا كەلەتىنىن اتاپ ءوتتى. ەڭ الدىمەن، عىلىمي جاڭالىقتارعا مۇقتاج كاسىپورىنداردى انىقتاۋ ءۇشىن ماركەتينگ جۇيەسىن ەنگىزۋ كەرەك جانە عىلىم قورى ءوز جۇمىسىن ينۆەستيتسيالىق تارتىمدىلىقتى ارتتىرۋعا، عىلىمي زەرتتەۋ ناتيجەلەرىن كوممەرتسيالاندىرۋعا باعىتتاۋى ءتيىس. وسىعان وراي ءا. سمايىلوۆ ءبىلىم جانە عىلىم مينيسترلىگىنە ءبىرقاتار تاپسىرما بەردى.
«ءبىرىنشى، 30-ساۋىرگە دەيىن قازاقستان عىلىمىن دامىتۋدىڭ 2022-2026 -جىلدارعا ارنالعان تۇجىرىمداماسىنىڭ قابىلدانۋىن قامتاماسىز ەتسىن. ەكىنشى، جاس تالانتتاردى ىزدەۋ جانە ولاردى عىلىمعا تارتۋ مەحانيزمدەرىن پىسىقتاسىن، زەرتتەۋ الەۋەتى جوعارى عالىمداردىڭ جاڭا بۋىنىنىڭ اقپاراتتىق بازاسىن جاساسىن. ۇشىنشىدەن، ۇلتتىق عىلىم اكادەمياسىنا مەملەكەتتىك مارتەبە بەرە وتىرىپ، ينستيتۋتسيونالدىق ترانسفورماتسيالاۋ شارالارىن قابىلداسىن»، - دەدى پرەمەر- مينيستر ۇكىمەت وتىرىسىندا.
سونىمەن بىرگە، عىلىم قورىنىڭ ەكونوميكالىق تيىمدىلىگىن ارتتىرۋعا، عىلىمي زەرتتەۋلەردى كاپيتالداندىرۋعا، ولاردىڭ ينۆەستيتسيالىق تارتىمدىلىعىن، بارلىق كەزەڭدەگى اشىقتىعىن ارتتىرۋعا ءمان بەرىپ، رەبرەندينگ جاساۋ تاپسىرىلدى.
«بيزنەس- قوعامداستىق وكىلدەرىمەن جانە «اتامەكەن» كاسىپكەرلەر پالاتاسىمەن بىرلەسىپ، حالىقتىڭ تابىسىن ارتتىرۋدىڭ 2025 -جىلعا دەيىنگى باعدارلاماسى جوباسىنا عىلىمدى قاجەت ەتەتىن وندىرىستەردى، جوعارى تەحنولوگيالىق جۇمىس ورىندارىن قۇرۋدا عىلىمنىڭ ۇلەسى ءبولىمىن قوسىپ، ونىڭ ناقتى ينديكاتورلارىن بەلگىلەۋدى قامتاماسىز ەتسىن. يندۋستريا جانە ەنەرگەتيكا مينيسترلىكتەرىمەن بىرلەسىپ، عىلىمي- تەحنيكالىق كەڭەستەر قۇرۋدى جانە جەر قويناۋىن پايدالانۋشىلاردىڭ عىلىمي- زەرتتەۋ جۇمىستارىن قارجىلاندىرۋىنىڭ ورتالىقتاندىرىلعان مەحانيزمى ەنگىزىلىسىن»، - دەدى ءاليحان سمايىلوۆ.
ايتا كەتەيىك، ۇكىمەت وتىرىسىندا پرەمەر- مينيستر عىلىم سالاسىنداعى قىزمەتكەرلەردى كاسىبي مەرەكەسىمەن قۇتتىقتادى.
«بۇگىن ەلىمىز عىلىم كۇنىن اتاپ وتەدى. ەلىمىزدە وتاندىق عىلىمدى دامىتۋ جولىندا ەڭبەك ەتىپ جۇرگەن بارلىق قىزمەتكەرلەردى كاسىبي مەرەكەسىمەن قۇتتىقتايمىن! سىزدەرگە تىڭ عىلىمي جاڭالىقتار، جۇمىستارىڭىزعا زور تابىس جانە ساتتىلىك تىلەيمىن! بۇگىنگى ۇكىمەت وتىرىسىندا وتاندىق عىلىمدى دامىتۋ ماسەلەسىن قارايمىز»، - دەدى ءاليحان سمايىلوۆ.