قاڭتار وقيعاسى كەزىندە قىزمەتىنە سالعىرت قاراعان ءبىرقاتار باسشىلار كۇدىككە ءىلىندى
ق ر باس پروكۋراتۋراسىنىڭ 1-قىزمەت باستىعىنىڭ ورىنباسارى ەلدوس قيلىمجانوۆ ورتالىق كوممۋنيكاتسيالار قىزمەتىندە وتكەن بريفينگىدە وسىنداي دەرەك كەلتىردى.
«الماتى، جامبىل جانە قىزىلوردا وبلىستارىنىڭ ۇلتتىق قاۋىپسىزدىك كوميتەتى جانە پوليتسيا دەپارتامەنتتەرىن، الماتى اۋەجايىنىڭ عيماراتىن تاستاپ كەتۋ فاكتىلەرى بويىنشا جۇمىستى جالعاستىرىپ جاتىرمىز. بۇل ورگانداردىڭ باسشىلارى كۇدىكتى رەتىندە تانىلدى. بۇعان دەيىن حابارلانعانداي، جامبىل وبلىسى پوليتسيا دەپارتامەنتى باستىعىنىڭ بۇرىنعى ورىنباسارى ۇستالدى. ول قىزمەتتىك قارۋدى ساقتاۋعا جاۋاپتى بولدى جانە قارۋ ارسەنالىنىڭ ءبىر بولىگىنىڭ تونالۋىنا جول بەردى»، - دەدى باس پروكۋراتۋرا وكىلى.
ايتۋىنشا، وسىنىڭ سالدارىنان قىلمىسكەرلەردىڭ قولىنا 610 قارۋ تۇسكەن.
«سونىڭ ىشىندە اۆتوماتتار، تاپانشالار، گراناتامەتتەر بولدى. قازىرگى ۋاقىتتا 206 قارۋ عانا تابىلدى. قالعاندارى قىلمىسكەرلەردىڭ قولىندا»، - دەدى ەلدوس قيلىمجانوۆ.
شارا بارىسىندا ول ارنايى پروكۋرورلاردىڭ جاپپاي تارتىپسىزدىكتەرگە 12 ۇيىمداسقان قىلمىستىق توپتىڭ قاتىسقانىن انىقتاعانىن ءمالىم ەتتى.