ەلوردادا ساۋدا ورتالىعىنىڭ پاركينگىنەن قوسۋلى تۇرعان ماينينگ جابدىعى تابىلدى
11:28, 11 - ءساۋىر 2022
نۇر- سۇلتان. قازاقپارات - نۇر- سۇلتاندا ساۋدا ورتالىعىنان سيفرلىق كريپتوۆاليۋتا وندىرۋگە ارنالعان زاڭسىز ماينينگ جابدىعى تابىلدى، دەپ حابارلايدى قازاقپارات.
پوليتسيا دەپارتامەنتى تاراتقان مالىمەتكە سايكەس كەزەكشىگە پاركينگ بولمەسىندە ماينينگكە ارنالعان جابدىق تابىلعانى جونىندە قوڭىراۋ تۇسكەن. جەلدەتۋ قۇبىرىنىڭ بەتىندەگى بولمەنى ارالاۋ كەزىندە قوسىلىپ تۇرعان 4 قۇرىلعى تابىلدى. زاڭسىز جابدىقتى ساۋدا ويىن- ساۋىق ورتالىعىنىڭ ينجەنەرى جەلدەتكىش قوراپتارداعى كابەلدىك جەلىلەردى تەكسەرۋ كەزىندە تاۋىپ، باسشىلىققا حابارلادى. قازىرگى ۋاقىتتا ماينينگ جابدىعىن تابۋ فاكتىسى بويىنشا ماتەريال تەرگەۋگە دەيىنگى تەكسەرۋ جانە پروتسەسسۋالدى شەشىم قابىلداۋ ءۇشىن ەكونوميكالىق تەرگەۋ دەپارتامەنتىنە بەرىلدى.