گولوۆكين مەن مۋراتا جەكپە-جەك الدىندا سالماق ولشەدى

نۇر-سۇلتان. قازاقپارات - سايتامادا (جاپونيا) 9- ءساۋىر كۇنى بوكس كەشىنە قاتىسۋشىلاردىڭ سالماق ولشەۋ ءراسىمى ءوتتى.

بۇل كەشتىڭ باستى وقيعاسى ورتا سالماقتاعى الەم چەمپيوندارى گەننادي گولوۆكين (41-1-1، 36 ك و) مەن ريوتا مۋراتا (16-2، 13 ك و) اراسىنداعى كەزدەسۋ بولماق، دەپ حابارلايدى قازاقپارات Sports.kz سايتىنا سىلتەمە جاساپ.

قارسىلاستار ورتا سالماقتاعى IBF جانە WBA Super تيتۋلدارى ءۇشىن جۇدىرىقتاسادى.

سالماق ولشەۋ قورىتىندىسى بويىنشا ەكى بوكسشى دا سانات شەگىن (72,5 كەلى / 160 فۋنتقا دەيىن) ورىنداپ، تارازىدا 72,5 كەلى سالماقتى كورسەتتى.

سايتاماداعى بوكس كەشى سەنبى، 9- ءساۋىر كۇنى نۇر-سۇلتان ۋاقىتى بويىنشا ساعات 15:00 دە باستالادى. گولوۆكين مەن مۋراتانىڭ باستى جەكپە-جەگى شامامەن ساعات 18:10 عا جوسپارلانعان.

قوس بوكسشىنىڭ رينگتە كەزدەسۋىن Qazsport جانە Qazaqstan تەلەارنالارىندا تىكەلەي ەفير ارقىلى تاماشالاۋعا بولادى.