ەۋرووداق ەلشىلەرى رەسەيگە قارسى سانكسيالاردىڭ جاڭا پاكەتىن ماقۇلدادى

پاريج. تاسس- قازاقپارات - ەۋرووداق ەلدەرىنىڭ ەلشىلەرى رەسەيگە قارسى سانكسيالاردىڭ بەسىنشى پاكەتىن ماقۇلدادى.

بۇل پاكەت، اتاپ ايتقاندا، جەكە تۇلعالار مەن قارجى ينستيتۋتتارىنا قاتىستى شەكتەۋلەردى، سونداي-اق رەسەيدەن كومىر اكەلۋگە جانە جوعارى تەحنولوگيالىق تاۋارلار جەتكىزۋگە ەمبارگو جاريالاۋدى قاراستىرادى.

ءتيىستى شەشىم بەيسەنبى كۇنى فرانسيانىڭ ەۋرووداق ءتوراعالىعىنىڭ Twitter- دەگى پاراقشاسىندا جاريالاندى، دەپ حابارلايدى قازاقپارات رەسەيلىك تاسس اقپارات اگەنتتىگىنە سىلتەمە جاساپ. «رەسەيگە قارسى وتە ماڭىزدى شارالار پاكەتى سانكسيالاردى جاڭا سالالارعا سالادى. اتاپ وتكەندە، ءبىز بىرنەشە رەسەيلىك بانكتەردىڭ اكتيۆتەرىن بۇعاتتاۋ، رەسەيدەن كومىر يمپورتتاۋعا تىيىم سالۋ، رەسەيگە قارسى قارۋ ەمبارگوسى، رەسەيگە جوعارى تەحنولوگيالىق تاۋارلاردى ەكسپورتتاۋعا تىيىم سالۋ تۋرالى ايتىپ وتىرمىز»، - دەلىنگەن مالىمدەمەدە.

تىيىم سالىنعان ەكسپورتتىق تاۋارلاردىڭ كولەمى 10 ميلليارد ەۋروعا باعالانادى، ال «شيكىزات پەن ماڭىزدى ماتەريالداردىڭ» يمپورتىنا قويىلعان شەكتەۋلەر 5,5 ميلليارد ەۋرونى قۇرايتىن تاۋارلارعا اسەر ەتەدى.

سونىمەن قاتار، رەسەي تۋىمەن جۇزەتىن كەمەلەرگە ەۋروپا ەلدەرىنىڭ پورتتارىنا كىرۋگە تىيىم سالىنادى، ال رەسەي فەدەراتسياسى مەن بەلارۋستىڭ كولىك كومپانيالارى ەندى ەۋرووداق اۋماعىندا جۇمىس ىستەي المايدى.

مالىمدەمەدە رەسەيلىك كاسىپكەرلەر مەن «ناسيحاتشىلارعا» قاتىستى جاڭا شەكتەۋلەر بولەك جازىلعان. سانكسيالار رەسەي قارۋلى كۇشتەرىنىڭ ۋكرايناداعى ارنايى اسكەري وپەراتسياسىنا بايلانىستى قاۋىپسىزدىك قىزمەتى، اسكەريلەر جانە ونەركاسىپ پەن تەحنولوگيالىق سەكتورلارداعى كاسىپورىنداردىڭ قىزمەتكەرلەرىنە دە قاتىستى.

«ە و كەڭەسى اتالعان شارالار پاكەتىن جازباشا ءراسىمنىڭ بولىگى اياسىندا قابىلدايدى جانە ەرتەڭ (8-ءساۋىر - تاسس) ە و رەسمي جۋرنالىندا جاريالانۋى ءتيىس»، دەلىنگەن حابارلامادا.

ءبىر كۇن بۇرىن رەسەيگە قارسى مۇناي ەمبارگوسى ە و-نىڭ تالقىلانىپ جاتقان سانكسيالارىنىڭ بەسىنشى پاكەتىنە كىرمەيتىنى، ءبىراق ەۋرووداق سىرتقى ىستەر مينيسترلەرى ونى 11-ساۋىردە قاراستىراتىنى تۋرالى حابارلانعان.