بۇرىنعى ءبىلىم جانە عىلىم ءمينيسترى قايتىس بولدى
«بەركىمبايەۆا ءشامشا كوپباي قىزىنىڭ ومىردەن وزعانى تۋرالى سۋىت حابار جەتىپ، كوڭىلدى قۇلازىتتى»، - دەپ جازدى اسحات ايماعامبەتوۆ.
ءشامشا كوپباي قىزى ەڭبەك جولىن اۋىل مۇعالىمى بولىپ باستاعان. ول ءار جىلدارى مەكتەپ ديرەكتورى، الماتى وبلىستىق پارتيا كوميتەتىنىڭ حاتشىسى، ءبىلىم ءمينيسترىنىڭ ورىنباسارى، قازاقستاننىڭ قىرعىزستانداعى ەلشىلىگىنىڭ ءبىرىنشى حاتشىسى، الماتى وبلىسى ءبىلىم باسقارماسىنىڭ باسشىسى قىزمەتتەرىن اتقارعان، سونىمەن قاتار قازاقستان پارلامەنتى سەناتىنىڭ دەپۋتاتى، ءبىلىم جانە عىلىم ءمينيسترى بولعان. ۇزاق جىلدار بويى قازاق ۇلتتىق قىزدار پەداگوگيكالىق ۋنيۆەرسيتەتىنىڭ رەكتورى بولعان.
«پەداگوگيكا عىلىمدارىنىڭ كانديداتى، دوتسەنت، اكادەميك ءشامشا كوپباي قىزى ەلىمىزدەگى ءبىلىم مەن عىلىم سالاسىنىڭ دامۋىنا ۇلكەن ۇلەس قوستى. ءشامشا كوپباي قىزى اۋىل مەكتەپتەرىن دامىتۋعا جانە دارىندى بالالاردى قولداۋعا جاعداي جاساۋعا ەرەكشە كوڭىل ءبولدى. جۇمىس كەزدەسۋلەرى كەزىندە ءشامشا كوپباي قىزى ۇنەمى ءوز تاجىريبەسىمەن جانە كەڭەستەرىمەن ءبولىسىپ، ءبىلىم سالاسىنداعى جاڭالىقتاردى قاداعالادى. وتاندىق ءبىلىم مەن عىلىم سالاسىنىڭ كورنەكتى تۇلعاسىنىڭ ومىردەن وزۋى - ورنى تولماس وكىنىش. ءشامشا كوپباي قىزىنىڭ وتباسى مەن جاقىندارىنا قايعىسىنا ورتاقتاسىپ، كوڭىل ايتامىن»، - دەپ جازدى ايماعامبەتوۆ.