اباي وبلىسىنىڭ قۇرىلاتىنىنا بايلانىستى سەمەيدە باسپانا باعاسى رەكوردتىق كورسەتكىشكە جەتتى

سەمەي. قازاقپارات - اباي وبلىسىنىڭ قۇرىلاتىنىنا بايلانىستى سەمەيدە باسپانا باعاسىنىڭ كۇرت قىمباتتاپ كەتكەنىن الەۋمەتتىك جەلىدە جارىسا جازىپ جاتقاندار بار.

وسىعان وراي، قازاقپارات ءتىلشىسى جەرگىلىكتى رەلتورلارمەن حابارلاسىپ، نارىقتاعى باعانى باعامداپ كوردى.

جىلجىمايتىن مۇلىك اگەنتتىگىنىڭ باسشىسى نۇرگۇل سۇلەيمەنوۆا باسپانا نارىعىنا بىرنەشە فاكتوردىڭ اسەر ەتكەنىن ايتادى.

«سەمەيدە پاتەردىڭ دە، جەر ءۇيدىڭ دە باعاسى رەكوردتىق كورسەتكىشكە جەتىپ وتىر. تەك جاڭالارى ەمەس، ەسكى ۇيلەردىڭ قۇنى دا قىمباتتاعان. بۇعان بىرنەشە فاكتور اسەر ەتتى. بىرىنشىدەن، قۇرىلىس ماتەريالدارىنىڭ باعاسى كوتەرىلگەنى بەلگىلى. بۇل جاڭا ۇيلەردىڭ قىمبات بولۋىنا اكەلدى. جاڭا وبلىستىڭ قۇرىلاتىنى تۋرالى جاڭالىق تا ىقپال ەتىپ وتىر. سەبەبى، حالىق قالاعا مول قارجى قۇيىلىپ، جاعداي وڭالادى دەپ ۇمىتتەنەدى. تەك ءۇيدىڭ ەمەس، جالعا بەرىلەتىن نىسانداردىڭ، كەڭسەلەردىڭ دە اي سايىنعى اقىسى جوعارىلاپ كەتتى. ال وسىعان دەيىن ەش قولدانىلماي، بوس تۇرعان عيماراتتار كوپ بولاتىن»، - دەيدى ول.

رەلتوردىڭ ايتۋىنشا، قايتالاما نارىقتاعى 32 شارشى مەترلىك ءبىر بولمەلى پاتەردىڭ باعاسى وسىدان 3 اي بۇرىن 8,5-10 ميلليون شاماسىندا بولسا، قازىر 10 ميلليون تەڭگەدەن باستالادى. 42 شارشى مەترلىك ءبىر بولمەلى پاتەردىڭ قۇنى بۇرىن 10-12 ميلليون شاماسىندا قۇبىلسا، بۇگىندە 12 ميلليون تەڭگەدەن اسىپ جىعىلادى.

«ورتاشا ەسەپپەن العاندا باعا وسىنداي. ارينە، باعا پاتەردىڭ قازىرگى جاعدايىنا، سالىنعان جىلىنا، ورنالاسقان كوشەسىنە، قاباتىنا بايلانىستى بەلگىلەنەدى. جىلى جاڭا 52 شارشى مەترلىك ەكى بولمەلى پاتەرلەر بۇگىن 15-20 ميلليون تەڭگە ارالىعىندا، ال بىرنەشە اي بۇرىن 13-15 ميلليون ەدى. ءۇش بولمەلى پاتەرلەر 18-30 ميلليون تەڭگەگە دەيىن تۇرادى. مەنىڭ ويىمشا، باعانى وسىنشاما ءوسىرۋ قيسىنعا كەلمەيدى. ادامدار ۇيلەرىنىڭ قۇنىن نەگىزسىز اسپانداتىپ جىبەردى»، - دەيدى 13 جىل بويى وسى سالادا جۇمىس ىستەپ جۇرگەن نۇرگۇل سۇلەيمەنوۆا.

ال تاعى ءبىر رەلتور جۇلدىز ماگازينوۆانىڭ پىكىرىنشە، ءۇي اباي وبلىسىنىڭ قۇرىلاتىنى جايلى حاباردان سوڭ بىردەن قىمباتتاپ كەتتى دەۋگە كەلمەيدى.

«باسپانا باعاسى بۇدان بۇرىن ءوسىپ كەتكەن. ماسەلەن، كەيبىر قۇرىلىس كومپانيالارى بىلتىر 1 شارشى مەترى ءۇشىن 240 مىڭ تەڭگە سۇراسا، بيىل باعا 280 مىڭعا جەتتى. ودان دا قىمباتتارى بار. ەسكى ۇيلەرگە قاتىستى ايتار بولساق، يپوتەكالىق باعدارلامانىڭ تالاپتارىنا ساي كەلەتىن پاتەرلەردىڭ قۇنى جوعارىلادى»، - دەيدى.

ونىڭ ايتۋىنشا، باعا نەگىزىنەن زەينەتاقى جيناعىن باسپانا الۋعا جۇمساۋعا رۇقسات بەرىلگەندە كۇرت وسكەن. سول كەزدە بىردەن 1,5-2 ميلليون تەڭگەگە قىمباتتاپتى.

«يپوتەكاعا الۋعا كەلمەيتىن ەسكى ۇيلەر عانا بۇرىنعى باعادا. بايقاۋىمشا، قازىر ساپاسى جاقسى، 2-3 بولمەلى پاتەرلەردى ارنايى باعدارلاما ارقىلى نەسيەمەن قول جەتكىزۋگە مۇمكىندىگى بارلار نەمەسە قالتالى ازاماتتار ساتىپ الىپ جاتىر. كوپشىلىك باعانى قولدان شارىقتاتىپ جىبەردى. بۇل ماسەلەنى مەملەكەت تاراپىنان رەتتەۋ كەرەك دەپ ويلايمىن»، - دەيدى رەلتور.

ايتا كەتەيىك، مەملەكەت باسشىسى قاسىم-جومارت توقايەۆ بيىلعى جولداۋىندا اباي وبلىسىن قۇرىپ، سەمەيدى ونىڭ ورتالىعى ەتۋدى ۇسىنعان بولاتىن.

اۆتور: تالعاتجان مۇحامەتبەك ۇلى