ەۋرووداق رەسەيدەن كومىر جەتكىزۋگە ەمبارگو جاريالاۋ ۇسىنىسىن ماقۇلدادى
بۇل تۋرالى ە و كەڭەسىندە ءمالىم ەتىلدى، دەپ حابارلايدى قازاقپارات Euronews اگەنتتىگىنە سىلتەمە جاساپ.
سونداي- اق، رەسەيگە قارۋ- جاراق ەكسپورتتاۋعا تىيىم سالىنادى. شەكتەۋلەر رەسەيلىك جۇك تاسىمالىنا، كەيبىر رەسەيلىك تاۋارلار، اتاپ ايتقاندا، جوعارى تەحنولوگيالىق تاۋارلاردىڭ يمپورتىنا اسەر ەتەدى جانە ءبىرقاتار رەسەيلىك بانكتەردىڭ اكتيۆتەرى توقتاتىلادى.
سانكسيالار تىزىمىندە كاسىپكەرلەر، جۋرناليستەر جانە اسكەري قىزمەتكەرلەر بار. شارالار پاكەتى جۇما كۇنى جاريالانادى. وسى كۇنى ەۋروپارلامەنت رەسەيدەن گاز، مۇناي جانە كومىر يمپورتىنا ەمبارگو ەنگىزۋدى تالاپ ەتتى. ەۋروپالىق پارلامەنتتىڭ رەزوليۋتسيالارى ەۋروپالىق وداقتىڭ اتقارۋشى ورگاندارى ءۇشىن مىندەتتى ەمەس. ەۋروپارلامەنت دەپۋتاتتارى ەۋرووداق كەڭەسىن «قۇجاتتا اتالعان رەسەي اگرەسسياسىنىڭ ەسكالاتسياسىنىڭ كۇشەيۋىنە سايكەس كەلەتىن قاتاڭ سانكسيالار قابىلداۋعا» ۇندەدى.
اۆتور: زارينا تۋعانبايەۆا