اقتوبەدە كولىگى كوپىردەن قۇلاپ كەتكەن بويجەتكەن عاجايىپتىڭ كۇشىمەن امان قالدى
14:26, 07 - ءساۋىر 2022
نۇر-سۇلتان. قازاقپارات - اقتوبەدە بويجەتكەن تىزگىندەگەن Toyota Camry كولىگى كوپىردەن قۇلاپ كەتتى.
ابىروي بولعاندا جول اپاتىنان ەشكىم زارداپ شەكپەگەن، دەپ حابارلايدى استانا ارناسى.
تەلەارنانىڭ مالىمەتىنشە، كوپىر قاتتى بيىك بولماعان، جۇرگىزۋشى دە اسا اۋىر جاراقات الماعان. ودان بولەك مەديتسينالىق تالداۋ بويجەتكەننىڭ الكوگولدى سۋسىن قولدانباعانىن كورسەتكەن.
بۇل جايتقا قاتىستى پىكىر بىلدىرگەن اقتوبە وبلىستىق پوليتسيا دەپارتامەنتىنىڭ دەرەگىنشە، اتالعان فاكتى بويىنشا سوتقا دەيىنگى تەرگەۋ باستالعان.
«تەكسەرۋ جۇمىستارى ءجۇرىپ جاتىر. وقيعانىڭ ءمان-جايى انىقتالۋدا»، - دەيدى پ د باسپا ءسوز قىزمەتىنەن.
ال ارۋدىڭ ايتۋىنشا، كولىك تىزگىندەپ كەلە جاتقاندا كەنەتتەن ءوزىن جايسىز سەزىنىپ، رولگە يە بولا الماي قالعان.