مەملەكەتتىك ءنومىرسىز جۇرگەن كولىك جۇرگىزۋشىسىنەن قارۋ تاركىلەندى
20:07, 06 - ءساۋىر 2022
نۇر-سۇلتان. قازاقپارات - قالا جولدارىندا مەملەكەتتىك تىركەۋ ءنومىرىنسىز جۇرگەن كولىك جۇرگىزۋشىسىنەن سۋىق قارۋ تابىلدى، دەپ حابارلايدى قازاقپارات نۇر-سۇلتان قالالىق پ د باسپا ءسوز قىزمەتىنە سىلتەمە جاساپ.
«تويوتا كامري» كولىگى تۇران داڭعىلىنىڭ بويىندا توقتاتىلعان. تەكسەرۋ بارىسىندا 35 جاستاعى جۇرگىزۋشىسىنەن تىركەۋدەن شىعارىلعان 12 مەملەكەتتىك ءنومىر بەلگىسى، جينالمالى پىشاق، گاز تاپانشاسى مەن 4 وق تاركىلەندى.
اتالعان دەرەك بويىنشا ق ر ق ك 287-بابى 2-تارماعىمەن سوتقا دەيىنگى تەرگەۋ باستالدى.
ساراپتاما تاعايىندالىپ، كولىك كوممۋنالدىق تۇراققا قويىلدى. سونداي-اق، كولىك جۇرگىزۋشىسىنىڭ استانا اۋماعىندا بولعان قانداي دا ءبىر قۇقىقبۇزۋشىلىقتارعا قاتىسى بار-جوقتىعىن انىقتاۋ باعىتىندا كەشەندى شارالار جۇرگىزىلىپ جاتىر.