شىعىس قازاقستاندا تاعى دا قار كوشكىنى ءجۇردى

وسكەمەن. قازاقپارات - شىعىس قازاقستان وبلىسىندا كۇننىڭ كۇرت جىلىنۋىنان تاعى دا قار كوشكىنى ءجۇردى، دەپ حابارلايدى قازاقپارات ءتىلشىسى.

ش ق و توتەنشە جاعدايلار دەپارتامەنتى باسپا ءسوز قىزمەتىنىڭ مالىمەتىنە سۇيەنسەك، 4- ساۋىردە ساعات 13.31 دە كاتونقاراعاي اۋدانىنداعى جەرگىلىكتى ماڭىزى بار «سوگورنوە-بارلىق» تاسجولىندا كوشكىن ءجۇردى.

«اتالعان تاسجولدىڭ 16-شاقىرىمىندا جالپى كولەمى 2300 تەكشە مەتر قار تۇسكەن. قار جولدى تولىقتاي جاۋىپ تاستادى. زارداپ شەككەن ەشكىم جوق»، - دەپ حابارلادى ۆەدومستۆو وكىلدەرى.

قازىرگى ۋاقىتتا جەرگىلىكتى اتقارۋشى ورگان قىزمەتكەرلەرى جولدى تازالاۋ جۇمىستارىن جۇرگىزىپ جاتىر.

ەستەرىڭىزگە سالا كەتسەك، وسىعان دەيىن «وسكەمەن-راحمان قاينارى» تاسجولىنىڭ 435 جانە 437 شاقىرىمدارىندا كوشكىن جۇرگەنى حابارلانعان بولاتىن.