پوليتسيا جانە ۇ ق ك دەپارتامەنتى باسشىلارى عيماراتتى قارۋىمەن بىرگە تاستاپ كەتكەن
«ارنايى پروكۋرورلار كۇش قۇرىلىمدارىنىڭ جەكەلەگەن باسشىلارىنا قاتىستى تەرگەۋدى جالعاستىرىپ جاتىر. 5- قاڭتاردا الماتى قالاسىندا، الماتى، جامبىل جانە قىزىلوردا وبلىستارىندا 2 پوليتسيا دەپارتامەنتى مەن 3 ۇلتتىق قاۋىپسىزدىك كوميتەتى دەپارتامەنتتەرىنىڭ باسشىلارى ءوز عيماراتتارىن، سونىڭ ىشىندە قارۋىمەن قالدىرعانى بەلگىلى. ولاردىڭ ءبارى كۇدىكتى دەپ تانىلدى. وسى فاكتىلەر بويىنشا قىزمەت بابىنداعى ارەكەتسىزدىك جونىندە 9 قىلمىستىق ءىس قوزعالدى»، - دەگەن باس پروكۋراتۋرا وكىلى الماتى اۋەجايىندا جەلىلىك پوليتسيا بولىمشەسىن باسقارعان ادامنىڭ دا كۇدىككە ىلىنگەن ءمالىم ەتتى.
«اعىمداعى جىلدىڭ 1 جانە 2 - ساۋىرىندە جامبىل وبلىسى پوليتسيا دەپارتامەنتى باستىعىنىڭ بۇرىنعى ورىنباسارى مەن الماتى اۋەجايىنداعى جەلىلىك پوليتسيا ءبولىمىنىڭ باستىعى ۇستالىپ، ۋاقىتشا ۇستاۋ يزولياتورىنا قامالدى. باسقا تۇلعالارعا قاتىستى قازىر دالەلدەمەلەردى جيناۋ جانە تالداۋ جۇرگىزىلىپ جاتىر»، - دەدى ەلدوس قيلىمجانوۆ.
اۆتور: ەسىمجان ناقتىباي