قازاقستاندا تۇرعىلىقتى جەرى بويىنشا تىركەۋدىڭ جاڭا ءتۇرى پايدا بولدى

نۇر-سۇلتان. قازاقپارات - ەلىمىزدە ازاماتتاردى تۇرعىلىقتى جەرى بويىنشا تىركەۋدە جاڭا پيلوتتىق جوبا ىسكە قوسىلدى.

بۇل تۋرالى ق ر ىشكى ىستەر مينيسترلىگىنىڭ وكىلى شۇعىلا تۇرلىبەك ءمالىم ەتتى، دەپ حابارلايدى قازاقپارات ءتىلشىسى.

«مەملەكەت باسشىسىنىڭ تاپسىرماسىنا سايكەس پوليتسيا قىزمەتىن سيفرلاندىرۋ شەڭبەرىندە بيىل ساۋىردەن باستاپ «Halyk Homebank» ءموبيلدى قوسىمشاسى ارقىلى ازاماتتاردى تۇرعىلىقتى جەرى بويىنشا تىركەۋدىڭ پيلوتتىق جوباسى ىسكە قوسىلدى. بۇل جاڭاشىلدىق قازاقستاندىقتارعا 5 مينۋتتىڭ ىشىندە تۇرعىلىقتى جەرى جانە ۋاقىتشا تۇراتىن جەرى بويىنشا تىركەلۋگە مۇمكىندىك بەرەدى»، - دەدى شۇعىلا تۇرلىبەك مينيسترلىكتە ونلاين وتكەن باسپا ءسوز ءماسليحاتىندا. سونداي-اق، ءى ءى م وكىلى اتالعان جاڭاشىلدىقتى قولدانۋدىڭ جولىن ايتىپ بەردى. «سمارتفونىڭىزعا «Halyk Homebank» موبيلدى قوسىمشاسىن جۇكتەپ، «مەملەكەتتىك قىزمەتتەر» بولىمىندە - «حالىقتى تۇرعىلىقتى جەرى بويىنشا تىركەۋ» تارماعىن تاڭداپ، تىركەۋ تۇرىنە، تىركەۋ مەرزىمىنە، قىزمەت الۋشىنىڭ مارتەبەسىنە بايلانىستى جولداردى تولتىرۋ جەتكىلىكتى. جالپى، ءبىزدىڭ مينيسترلىك ۇسىناتىن مەملەكەتتىك قىزمەتتەردى سيفرلاندىرۋ جانە اۆتوماتتاندىرۋ جۇمىسى جالعاسىن تابۋدا»، - دەيدى ول.

ونىڭ ايتۋىنشا، بۇگىندە ىشكى ىستەر مينيسترلىگى ۇسىناتىن 40 مەملەكەتتىك قىزمەتتىڭ 38 ى اۆتوماتتاندىرىلعان.