ەلوردادا ينتەرنەت الاياقتىق قىلمىسى وسۋدە
بۇل قالا اۋماعىندا جاسالعان جالپى قىلمىستىڭ 24 پايىزىن قۇرايدى، دەپ حابارلايدى قازاقپارات ءتىلشىسى.
نۇر-سۇلتان قالالىق پوليتسيا دەپارتامەنتىنىڭ مالىمەتىنشە، ءۇش ايدىڭ ىشىندە ەلوردادا 25 ينتەرنەت الاياعى ۇستالىپ، قىلمىستىق جاۋاپكەرشىلىككە تارتىلدى. الاياقتاردىڭ كەلتىرگەن شىعىنى 12 ميلليون تەڭگەدەن اسادى. ۇستالعانداردىڭ جاسى 20 مەن 35 جاس ارالىعىندا. ولاردىڭ ءبىرىنىڭ 30 رەت الاياقتىق جاساعانى انىقتالدى.
كۇدىكتى جەكە جارنامالارعا ارنالعان تانىمال سايتتاردىڭ بىرىندە حابارلاندىرۋ ورنالاستىرىپ وتىرعان. الدىن الا تولەمدى ۆيرتۋالدى كارتاعا اۋدارۋدى سۇراپ، تاۋاردى ەكى كۇننىڭ ىشىندە جەتكىزۋگە ۋادە بەرگەن.
ءبىراق، اقشا كارتاسىنا تۇسكەننەن كەيىن حابارلاندىرۋىن جويىپ، تەلەفونىن ءوشىرىپ تاستاعان. ول ەلوردالىقتارعا 2500000 تەڭگە شىعىن كەلتىرگەن. قازىرگى ۋاقىتتا سوتقا دەيىنگى تەرگەۋ امالدارى جۇرگىزىلىپ جاتىر.
«ونلاين- ساۋدا مەن قىزمەتتەر ءتۇرى تانىمال بولا تۇسۋىنە بايلانىستى ەلوردانىڭ بارلىق تۇرعىنى بانك كارتاسىن اشتىرعان. ءبىراق، بارلىعى بىردەي، اسىرەسە ەگدە جاستاعى ادامدار مەن زەينەتكەرلەر ينتەرنەت- بانكينگ پەن ونىڭ قىزمەت مۇمكىندىكتەرىن بىلە بەرمەيدى. ماسەلەن، بانك كارتاسىنىڭ رەكۆيزيتتەرىن ءۇشىنشى تۇلعالارعا ايتسا نەمەسە بەرسە، وندا قىلمىسكەرلەر ينتەرنەت- بانكينگتىڭ ەسەپكە الۋ جازبالارىنا ەركىن كىرىپ، ەسەپشوتتى باسقارا الادى»، - دەپ اتاپ وتەدى ۆەدومستۆودان.
وسىعان وراي پوليتسيا دەپارتامەنتى ينتەرنەت الاياقتىقتىڭ كەڭ تاراعان ەسكەرتىپ وتىر. ياعني، الاياقتار الەۋمەتتىك جەلىدە بەلگىلى ءبىر تاۋاردىڭ ساتىلاتىنى تۋرالى جالعان حابارلاما ورنالاستىرادى. ولاردىڭ قاتارىندا ۇيالى تەلەفوندار، توندار، زەرگەرلىك بۇيىمدار، كولىك بولشەكتەرى، اۆتوموبيلدەر بولۋى مۇمكىن. ادەتتە ساتىپ الۋشىلار تاۋاردىڭ وزگە حابارلاندىرۋعا قاراعاندا باعاسىنىڭ ءبىرشاما تومەندىگىنە الدانىپ قالادى. وسى ورايدا تاۋاردى ساتىپ الۋعا اسىقپاۋ كەرەك. الدىمەن تاۋاردىڭ بار ەكەنىنە جانە ونىڭ ساپاسىنا كوز جەتكىزگەن ءجون. ءتىپتى ساتۋشىدان ۆيدەوقوڭىراۋ ارقىلى تاۋاردى كورسەتۋدى دە تالاپ ەتۋ قاجەت.