تۇركى الەمىنە تانىمال انشىلەر تۇركىستان ءوڭىرىنىڭ تۋريزمىن ناسيحاتتادى
تۇركىستاندا «تۇركىستان - تۇركى الەمىنىڭ رۋحاني استاناسى» اتتى حالىقارالىق تۋريزم دوداسى رەاليتي- شوۋىنىڭ تەليەۆيزيالىق نۇسقاسى ۇيىمداستىرىلدى. تۇركىستان وبلىسى تۋريزم باسقارماسىنىڭ قولعا الۋىمەن جۇزەگە اسقان جوباعا تۇركى تىلدەس 5 مەملەكەتتىڭ انشىلەرى قاتىستى. اتاپ ايتساق، ولاردىڭ ىشىندە بەلگىلى ءانشى، قىرعىز رەسپۋبليكاسىنىڭ ەڭبەك سىڭىرگەن ءارتىسى - ميربەك اتابەكوۆ، وزبەكستاندىق تانىمال اكتريسا، ءانشى ءارى تەلەجۇرگىزۋشى - سيتورا فارمونوۆا، اتاقتى انشىلەر اميل مامەدوۆ (ءازىربايجان) پەن سەرەن ۋزۋن (تۇركيا) جانە قازاقتىڭ ۇلتتىق ونەرىن ناسيحاتتاپ جۇرگەن ازامات الەكسەي لودوچنيكوۆ بار.
«Tourism kz» تەلەارناسى ۇيىمداستىرعان رەاليتي- شوۋعا قاتىسۋشىلار تۇركىستان وبلىسىنىڭ ماڭىزدى تۋريستىك ورىندارىن ارالادى. ارىستان باب، قوجا احمەت ياساۋي كەسەنەسى مەن كونە ساۋران، وتىرار قالاشىقتارىنىڭ تاريحىنا بويلادى. سونىمەن بىرگە «كەرۋەن ساراي» كەشەنى مەن اقمەشىت ۇڭگىرىن كوردى. تىكۇشاقپەن «سايرام- وگەم» مەملەكەتتىك ۇلتتىق تابيعي پاركى مەن «اقسۋ- جاباعىلى» مەملەكەتتىك تابيعي قورىعىنا ساياحات جاسادى. بۇل رەاليتي- شوۋ قازاقستان رەسپۋبليكاسىنىڭ سىرتقى جانە ىشكى ءتۋريزمىن دارىپتەۋگە، شەتەلدىكتەر ءۇشىن تۇركىستان وبلىسىنىڭ ۇلتتىق تاريحي- مادەني قۇندىلىقتارىن ناسيحاتتاۋعا، تۇركى تىلدەس مەملەكەتتەر اراسىنداعى قارىم- قاتىناستاردى، مادەني بايلانىستاردى نىعايتۋعا ارنالعان. دودا قاتىسۋشىلارى ءوز جانكۇيەرلەرى مەن تىندارماندارىنا تۇركىستان وبلىسىنىڭ تاريحي ورىندارىن تانىستىردى. ولار رۋحاني استاناعا تۋريستەردىڭ كوپتەپ كەلۋ باستاماسىن كوتەردى. انشىلەر جوبانىڭ قورتىندىسى رەتىندە «كەرۋەن ساراي» كەشەنىندە جۇرتشىلىققا گالا- كونسەرت بەردى. تانىمال اندەرىن شىرقاپ، تۇركىستاندىقتار مەن قوناقتارىنىڭ كوڭىلىن سەرپىلتتى.
ۇيىمداستىرۋشىلار تاراپىنان سەرەن ۋزۋنعا - «ءساتتى قادام» ، سيتورا فارمونوۆاعا - «تۋريزم تارلانى» ، اميل مامەدوۆكە - «زياتكەر جيغانگەز»، ميربەك اتابەكوۆكە - «تۋريزم دارابوزى» جانە الەكسەي لودوچنيكوۆكە «دوستىق جارشىسى» اتالىمدارى بويىنشا سىيلىقتار تاپسىرىلدى. جوعارىدا اتالعان انشىلەرمەن بىرگە گالا- كونتەرتتە بەيبىت كوشقاليەۆ، سادراددين بولات سىندى قازاقستاندىق انشىلەر دە ونەر كورسەتتى. بۇگىندە تۇركىستان وبلىسىنا كەلەتىن تۋريستەر سانى ارتىپ كەلەدى. ناۋرىز مەرەكەسىنە ارنالعان 5 كۇندىك دەمالىستا تۇركىستانعا 35 مىڭنان استام ادام كەلىپ، تاريحي ورىندارى ارالاعان.