بەيجىڭدە ناۋرىز مەيرامى تويلاندى

نۇر- سۇلتان. قازاقپارات - قازاقستاننىڭ قىتايداعى ەلشىلىگىندە جاقسىلىقتىڭ جارشىسى، ىزگىلىك پەن بەرەكەنىڭ باستاۋى، كوكتەم مەن جاڭارۋ مەرەكەسى، ۇلىستىڭ ۇلى كۇنى - ناۋرىز مەيرامىن ءداستۇرلى تۇردە اتاپ ءوتتى، دەپ حابارلايدى قازاقپارات ق ر سىرتقى ىستەر مينيسترلىگىنىڭ باسپا ءسوز قىزمەتىنە سىلتەمە جاساپ.

مەرەكەگە بەيجىڭدەگى قازاق ەلىنىڭ ديپلوماتتارى مەن ولاردىڭ وتباسى مۇشەلەرى، شانحاي ىنتىماقتاستىق ۇيىمى حاتشىلىعىنىڭ جانە قازاقستان ۇلتتىق كومپانيالارى وكىلدىكتەرىنىڭ قىزمەتكەرلەرى، سونداي- اق قىتايداعى قازاق دياسپوراسىنىڭ وكىلدەرى جانە قىتاي جوعارى وقۋ ورىندارىندا ءبىلىم الىپ جاتقان قازاقستاندىق ستۋدەنتتەر قاتىستى. ءوزىنىڭ العى سوزىندە قازاقستاننىڭ ەلشىسى عابيت قويشىبايەۆ قالىڭ جۇرتشىلىققا ناۋرىز مەرەكەسىنىڭ كوپ عاسىرلىق مۇراسىنا توقتالىپ، سامارقاننىڭ كوك تاسى ەرىپ، قارا جەر بۋسانعان، ادامزاتقا باق پەن داۋلەت، قۇت پەن بەرەكە اكەلگەن، جاڭارۋ مەن جاسارۋدىڭ مەرەكەسى عانا ەمەس، ناۋرىز مەيرامى سونىمەن قاتار حالىقتار مەن رۋحاني مادەنيەتتى بىرىكتىرۋشى، بەيبىتشىلىك پەن بىرلىكتى، تاتۋلىقتى ساقتاۋشى، ادامداردىڭ جاقسىلىق پەن جارقىن بولاشاققا دەگەن سەنىمى ەكەنىن باسا ايتتى.

سالتاناتتى شارا اياسىندا قازاقستاندىق ديپلوماتيالىق ميسسيا باسشىسى ش ى ۇ باس حاتشىسىنىڭ ورىنباسارى ەرىك ءاشىموۆ پەن ش ى ۇ حاتشىلىعى جانىنداعى ق ر تۇراقتى وكىلى نۇرلان اققوشقاروۆقا حالىقارالىق ارەنادا قازاقستاننىڭ مۇددەسىن قورعاۋعا جانە ىلگەرىلەتۋگە قوسقان ۇلەسى ءۇشىن «قازاقستان تاۋەلسىزدىگىنە 30 جىل» مەرەيتويلىق مەدالدارىن تابىس ەتتى. ءىس- شارانىڭ ناعىز «ءىنجۋ- مارجانى» قازاقستاندىق ديپلوماتيا وكىلدىگى جانىنداعى قوعامدىق كەڭەس ۇيىمداستىرعان مەرەكەلىك كونسەرت بولدى. بەيجىڭدە جۇمىس ىستەيتىن ديپلوماتتار مەن قازاقستاندىقتاردىڭ بالالارى بي بيلەپ، اننەن شاشۋ شاشتى. كىشكەنتاي ارتىستەردىڭ ورىنداۋىنداعى «ناۋرىز»، «اتامەكەن»، «مەن قازاقپىن» سياقتى قازاق اندەرى، «قاماجاي»، «تۇلپار» جانە «قازاق ءبيى» سىندى بيلەرى جينالعان قاۋىمعا ەرەكشە كوڭىل- كۇي سىيلادى. سونىمەن قاتار اسىق اتۋ، ارقان تارتۋ، توعىزقۇمالاق سياقتى ۇلتتىق سپورت ويىندارى كوپشىلىكتىڭ كوڭىلىنەن شىقتى.