قاتار مەملەكەتىنىڭ يندۋستريا جانە ساۋدا ءمينيسترى - جوعارى دەڭگەيدەگى قازاقستان- قاتار بىرلەسكەن كوميسسياسىنىڭ تەڭ ءتوراعاسى شەيح مۇحاممەد بين حاماد ءال تانيمەن كەلىسسوز بارىسىندا تاراپتار ساۋدا- ەكونوميكالىق بايلانىستاردى ودان ءارى دامىتۋ جانە مەملەكەتتەر اراسىنداعى ەكىجاقتى ساۋدا اينالىمىن ۇلعايتۋ قاجەتتىگىن اتاپ ءوتتى. وسى تۇرعىدا ۇكىمەتارالىق كوميسسيانىڭ مۇمكىندىكتەرىن پايدالانۋدىڭ ماڭىزدىلىعى اتاپ ءوتىلدى، ونىڭ كەلەسى 6-وتىرىسىن اعىمداعى جىلى دوحا قالاسىندا وتكىزۋ جوسپارلانىپ وتىر.
ق ر س ءى م باسشىسى قاتار قازاقستاننىڭ اراب الەمىندەگى ماڭىزدى ساياسي جانە ەكونوميكالىق ارىپتەسى ەكەنىن مالىمدەدى.
«ەلدەرىمىز اراسىندا جوعارى ساياسي دەڭگەيدە اشىق جانە سەنىمدى ديالوگ ورناعان. بىرلەسكەن كۇش- جىگەرىمىزبەن ىنتىماقتاستىعىمىزدى دامۋدىڭ ساپالى جاڭا ساتىسىنا كوتەرەتىنىمىزگە سەنىمدىمىز»، - دەدى م. تىلەۋبەردى.
تاراپتار بىرلەسكەن ءىس- شارالار كەستەسىن، ونىڭ ىشىندە قاتار ءامىرى شەيح تاميم بەن حاماد ءال ءتانيدىڭ قازاقستانعا الداعى مەملەكەتتىك ساپارى قارساڭىندا قازاقستان- قاتار ينۆەستيتسيالىق فورۋمىن جانە Astana Financial Days شەڭبەرىندە قاتار كۇنىن وتكىزۋدى تالقىلادى. مينيستر م. تىلەۋبەردى سونداي- اق «Qatar Investment Authority» قاتار ينۆەستيتسيالىق قورىنىڭ باسقارما ءتوراعاسى مانسۋر ءال- ماحمۋد، قاتار بيزنەسمەندەرى قاۋىمداستىعىنىڭ ءتوراعاسى، «Faisal Holding» باسشىسى شەيح فەيسال بەن كاسيم ءال- تاني، «Power International Holding» باسقارما ءتوراعاسى مۋتاز ءال- حاياتپەن بولەك كەزدەسۋلەر وتكىزدى.
وسى كەزدەسۋلەر بارىسىندا بىرلەسكەن ينۆەستيتسيالىق قور قۇرۋ جانە تاۋ- كەن ونەركاسىبى، اۋىل شارۋاشىلىعى، مەديتسينا جانە تۋريزم سالاسىنداعى ءبىرقاتار ءىرى ينۆەستيتسيالىق جوبالاردى ىسكە اسىرۋ ماسەلەلەرى تالقىلاندى.