بۇل تۋرالى قاۋىپسىزدىك ساياساتى جانە دامۋ ينستيتۋتىنىڭ ديرەكتورى، ورتالىق ازيا جانە كاۆكاز ينستيتۋتىنىڭ ديرەكتورى سۆانتە كورنەلل ايتتى، دەپ حابارلايدى قازاقپارات.
«پرەزيدەنت ق. ك. توقايەۆ ءوزىنىڭ پرەزيدەنتتىگىنىڭ باسىنان باستاپ قازاقستاندىق ساياسي جۇيەنىڭ بارلىق سالاسىن قامتيتىن بايىپتى ساياسي رەفورمالارعا كوشۋدى باستادى. ونىڭ ساياسي جۇيەنىڭ تيىمدىلىگى تۋرالى ۇنەمى اشىق ايتاتىنىن اتاپ وتكەن ءجون. ال بۇل جولعى جولداۋىندا ول بۇرىنعىدان دا اشىق بولدى. ول ءۇشىن حالىقتىڭ پىكىرى ماڭىزدى ەكەنىن اشىق ايتتى. جولداۋ قوعامنىڭ بارلىق سۇرانىستارىنا جاۋاپ بەرەدى دەۋگە بولادى»، - دەدى قاۋىپسىزدىك ساياساتى جانە دامۋ ينستيتۋتىنىڭ ديرەكتورى، ورتالىق ازيا جانە كاۆكاز ينستيتۋتىنىڭ ديرەكتورى سۆانتە كورنەلل (شۆەتسيا) ق ر پرەزيدەنتى جانىنداعى قازاقستان ستراتەگيالىق زەرتتەۋلەر ينستيتۋتى ۇيىمداستىرعان دوڭگەلەك ۇستەل وتىرىسىندا.
بۇدان بولەك، گەرمانيانىڭ «جاسىلدار» پارتياسىنىڭ نەگىزىن قالاۋشى، ەۋروپارلامەنتتىڭ بۇرىنعى دەپۋتاتى، ساياسي قايراتكەر فرانك شۆالبا-حوت (ە و) «ۇلتتىق قۇرىلتاي» قوعامدىق سەنىم كەڭەسىنىڭ العا قويعان ماقساتىنا جەتىپ، كوپتەگەن ەلدەرگە ۇلگى بولۋىن تىلەدى.
سونىمەن قاتار ول قۇرىلتاي تەك ساياسي كەڭەس ەمەس، سونداي-اق قاراپايىم ادامداردىڭ، قاراپايىم حالىقتىڭ مۇددەسىن قورعايتىن ۇيىم بولۋىنا تىلەكتەستىك ءبىلدىردى. ال رەسەي عىلىم اكادەمياسى شىعىس تانۋ ينستيتۋتىنىڭ ورتالىق ازيا سەكتورىنىڭ مەڭگەرۋشىسى يگور ساۆين (رەسەي) جەرگىلىكتى ءوزىن-ءوزى باسقارۋعا كوشۋ ەتنيكالىق ازشىلىق ماسەلەلەرىن تيىمدىرەك شەشۋگە مۇمكىندىك بەرەتىنىن ايتتى.
ونىڭ پىكىرىنشە، قازاقستان ءارقاشان ەتنوستاردى ساياسيلاندىرماۋ باعىتىن ۇستانىپ، ەتنوستى قوعامنىڭ الەۋمەتتىك كۇن ءتارتىبىنىڭ ولشەمدەرىنىڭ ءبىرى رەتىندە قاراستىرۋدى ءجون كوردى.
«قازاقستاننىڭ اۋقىمدى ساياسي رەفورمالار باعدارلاماسىن جۇزەگە اسىرۋعا دايىندىعى باسقا مەملەكەتتەر ءۇشىن ەلدىڭ ءوز ىشكى ماسەلەلەرىنە باسا نازار اۋدارۋعا نيەتتى ەكەندىگىن بايقاتادى. رەفورمالاردىڭ ءبىرقالىپتى، كەزەڭ-كەزەڭمەن جۇرگىزىلۋى ەل باسشىلىعىنىڭ نيەتىنىڭ بايىپتىلىعىن كورسەتەدى. جولداۋ ىسكەرلىك سيپاتتا بولدى جانە بۇل رەفورمالاردان ناتيجە شىعاتىنىنا سەنىمدىلىك بەرەدى»، - دەپ اتاپ ءوتتى ساراپشى.