ورتالىق كوممۋنيكاتسيالار قىزمەتىندە وتكەن بريفينگىدە ق ر ەنەرگەتيكا ءمينيسترى بولات اقشولاقوۆقا وسىنداي سۇراق قويىلدى، دەپ حابارلايدى قازاقپارات ءتىلشىسى.
«كاسپيي قۇبىر كونسورتسيۋمى بويىنشا ديۆەرسيا نۇسقاسىن مۇلدە قاراستىرمايمىز. تەحنيكالىق استاردان باسقا ەشتەڭە كورىپ تۇرعان جوقپىز. قويىپ وتىرعان سۇراعىڭىزدىڭ ورىندى تۇسى بار. مۇنداي نىساندار داۋىل سياقتى شەتىن جاعدايلارعا دايىن بولۋى كەرەك ەكەنى راس. ويتكەنى قارا تەڭىز مازاسىز. ول جەردە پورت سالعان كەزدە وسىنىڭ ءبارى ەسكەرىلەدى.
«ەسكىنى جاماعاننىڭ ەسى كەتەدى» دەگەن جاقسى ءسوز بار. 10 جىل بويى 7 بالدىق داۋىلدارعا توتەپ بەرسە دە، ۋاقىت وتە كەلە توزۋى مۇمكىن. ادام دا جىلدار وتە قارتايادى. قوندىرعىلار دا ۋاقىت وتكەن سايىن جاڭارمايدى. كەيدە تەحنيكالىق بولىكتە اقاۋ بولۋ ءۇشىن كىشىگىرىم وقيعا دا جەتىپ جاتادى. قازىر بۇل تۋرالى ايتۋ ماعان قيىن. ويتكەنى پورت وزگە ەلدىڭ يۋريسديكسياسىندا ورنالاسقان. ءوز ساراپشىلارىمدى، قاداعالاۋشىلارىمدى ول جاققا جىبەرە المايمىن»، - دەدى مينيستر.
ۆەدومستۆو باسشىسى كاسپي قۇبىر كونسورتسيۋمى جەكەلەگەن ءبىر مەملەكەتتىڭ مەنشىگىندەگى كاسىپورىن ەمەس ەكەنىن ەسكە سالدى.
«پورت پەن ونىڭ ايلاقتارى كاسپي قۇبىر كونسوتسيۋمىنىڭ مەنشىگىندە. ونى ءتۇرلى ازاماتتار باسقارادى. اراسىندا ءبىزدىڭ ازاماتتار دا، رەسەيدىڭ ازاماتتارى دا بار. ءبىراق بۇل كومپانيا قۇرامىنا كوپتەگەن باتىس كومپانيالارى كىرەتىن كونسورتسيۋمنىڭ مۇددەسىنە جۇمىس ىستەيدى. ياعني، قازاقستاندىق جانە رەسەيلىك كومپانيالارمەن بىرگە كوپتەگەن ەۋرورپالىق، امەريكالىق كومپانيالار قاتىسىپ وتىر. سوندىقتان، وندا جالدانىپ جۇمىس ىستەيتىن پەرسونال قانداي دا ءبىر ەلگە ەمەس، كاسپي قۇبىر كونسورتسيۋمىنا جۇمىس ىستەيدى. قانداي دا ءبىر ەلدىڭ مۇدەدسىنە ەمەس، جوبانىڭ مۇددەسىنە جۇمىس ىستەيدى. كونسورتسيۋم باسشىلىعىنىڭ مالىمەتىنە سەنبەۋگە مەندە ەشقانداي نەگىز جوق. بىرنەشە كۇن بولدى تىعىز بايلانىستامىز. دەگەنمەن ناقتى كورىنىس بەلگىسىز. ويتكەنى كەشە داۋىل بولعاندىقتان سۇڭگۋىرلەر تۇسە المادى. ولاردىڭ زەرتتەۋى بولعان جوق. كەشە كەشكە داۋىل باسىلىپ، سۇڭگۋىرلەر بۇگىن ءتۇستى. ەندى سولاردان مالىمەت كۇتىپ وتىرمىن»، - دەدى بولات اقشولاقوۆ.
اۆتور: ەسىمجان ناقتىباي