ەنەرگەتيكا مينيسترلىگى رەسەيدەن جوسپارلى ەلەكتر يمپورتىن جولعا قويماقشى
بۇل تۋرالى مينيستر بولات اقشولاقوۆ ورتالىق كوممۋنيكاتسيالار قىزمەتىندە وتكەن بريفينگىدە ايتتى، دەپ حابارلايدى قازاقپارات ءتىلشىسى.
«ءبىز قازىر رەسەي فەدەراتسياسىمەن ەلەكتر ەنەرگياسىنىڭ جوسپارلى يمپورتى تۋرالى كەلىسىمگە كەلمەكشىمىز. ويتكەنى بۇعان دەيىنگى يمپورتتار تەحنيكالىق اعىن ارقىلى جەتكىزىلىپ كەلگەن ەدى. رەسەيلىك ارىپتەستەرىمىزبەن جوسپارلى يمپورتتىڭ كولەمى قانشا بولاتىنى تۋرالى كەلىسسوز جۇرگىزىپ جاتىرمىز. ءدال قازىرگى جاعدايدى ايتساق، قارجىلىق مونيتورينگ اگەنتتىگىمەن، ەنەرگەتيكالىق قاداعالاۋشى ورگانمەن بىرگە زاڭسىز جالعانىپ العانداردى، قارا ماينينگ سۋبەكتىلەرىن انىقتاۋ جۇمىستارى جۇرگىزىلدى، جۇرگىزىلىپ تە جاتىر. جۇيەگە ايتارلىقتاي ەلەكتر قۋاتىن قايتارا الدىق. شامالاپ ايتساق، 300 م ۆ ت زاڭسىز تۇتىنىلىپ كەلگەن ەنەرگيا انىقتالدى. بۇل جۇمىس جالعاسىپ جاتىر. تاعى تۇتىنۋى شەكتەلگەن سۋبەكتىلەردە 600 م ۆ ت- قا دەيىن قۋات بار. بۇگىندە جۇيە تەڭگەرىمگە كەلدى. ايتارلىقتاي تاپشىلىق كورىپ وتىرعان جوقپىز»، - دەگەن ۆەدومستۆو باسشىسى رەسەيدەن ەلەكتر يمپورتتاۋدىڭ سەبەبىن ءتۇسىندىردى.
«نەگە جوسپارلى يمپورتتى ويلاستىرا باستادىق دەگەنگە كەلسەك، ءبىرىنشى كەزەكتە ۋكراينا زاۋىتتارىنان قوسالقى بولشەكتەردى، مونتاجداۋ بريگادالارىن جەتكىزۋ بويىنشا ماسەلەلەر بار. ياعني، تاپ بولۋىمىز مۇمكىن وبەكتيۆتى پروبلەمالار بار. سوندىقتان بۇل جاعىنا دا دايىن بولۋىمىز كەرەك. ەكىنشىدەن، وكىنىشكە قاراي، بىزدەگى ەلەكتر ستانسالارىنىڭ قىزمەت كورسەتۋ مەرزىمى ەسكىرىپ بارادى. ستانسالاردا اپات جيىلەپ كەتكەن. وسىنداي ولقىلىقتارعا جول بەرمەۋ ءۇشىن قانداي دا ءبىر جوسپارلى يمپورت تۋرالى ويلاۋ كەرەك بولىپ تۇر»، - دەدى بولات اقشولاقوۆ.