قازاقساندا ارناۋلى ءبىلىم بەرۋ ۇيىمدارىنا ءتۇسۋ ءۇشىن ءوتىنىم قابىلداۋ ءجۇرىپ جاتىر

نۇر-سۇلتان. قازاقپارات - قازاقستاننىڭ بارلىق وڭىرىندە دارىندى بالالارعا ارنالعان ءبىلىم بەرۋ ۇيىمدارىنا تۇسۋگە وتىنىشتەر قابىلداۋ جالعاسىپ جاتىر، دەپ حابارلايدى قازاقپارات ق ر ءبىلىم جانە عىلىم مينيسترلىگىنىڭ باسپا ءسوز قىزمەتىنە سىلتەمە جاساپ.

وقۋشىلار اراسىندا كونكۋرستىق ىرىكتەۋ 2022-2023 وقۋ جىلىنا ءتۇسۋ ءۇشىن وتكىزىلەدى.

ۇمىتكەرلەر بيىلعى جىلدىڭ 1- ساۋىرىنە دەيىن www.qabyldau.daryn.kz سايتىندا ونلاين تىركەلىپ، قۇجاتتارىن تاپسىرا الادى.

سونىمەن قاتار تىركەۋدى كورسەتىلگەن مەرزىم ىشىندە تاڭدالعان مامانداندىرىلعان ءبىلىم بەرۋ ۇيىمىندا تىكەلەي وتۋگە بولادى.

«ارناۋلى ءبىلىم بەرۋ ۇيىمدارىنا 5، 6، 7-سىنىپتار قابىلدانادى. ول ءۇشىن بالانىڭ اتا-اناسى نەمەسە زاڭدى وكىلدەرى ءوتىنىش بەرىپ، مىناداي قۇجاتتاردى ۇسىنۋى كەرەك: وقۋشىنىڭ تۋۋ تۋرالى كۋالىگىنىڭ كوشىرمەسىن، بالانىڭ وقۋ ورنىنان انىقتاما جانە ونىڭ فوتوسۋرەتى. بايقاۋدىڭ وتەتىن كۇنى تۋرالى قوسىمشا حابارلايمىز»، - دەلىنگەن مينيسترلىك تاراتقان حابارلامادا.

ەمتيحاندار تەستىلەۋ فورماتىندا وتكىزىلەدى. وقۋعا تۇسۋشىلەر ماتەماتيكا، لوگيكا، وقۋ ساۋاتتىلىعى جانە قازاقستان تاريحى بويىنشا ەمتيحان تاپسىرادى.

كونكۋرستىق ىرىكتەۋدىڭ بارلىق تەست تاپسىرماسى لوگيكالىق تاپسىرمالاردى قامتيتىن وقۋ باعدارلاماسى نەگىزىندە قۇراستىرىلعان. تەستىلەۋ ءار ءوڭىردىڭ نەگىزگى مەكتەپتەرىندە وتكىزىلەدى.

تالاپكەرلەردى ارناۋلى ءبىلىم بەرۋ ۇيىمدارىنا وقۋعا قابىلداۋ ەڭ جوعارى بال سانىنا قاراي جۇزەگە اسىرىلادى.

ارناۋلى ءبىلىم بەرۋ ۇيىمدارىنا قابىلداۋ تۋرالى تولىق اقپارات www.qabyldau.daryn.kz سايتىندا ورنالاستىرىلعان.