سوت بۇل ءىستى ءبىر جىلدان اسا ۋاقىتتان بەرى قاراپ جاتىر. ال ەكس-مينيستر ءوزىن ءالى كىناسىز دەپ ەسەپتەيدى. بۇرىنعى دەنساۋلىق ساقتاۋ مينيسترىنە قاتىستى قىلمىستىق ءىس بويىنشا اپپەلياتسيالىق سوت وتىرىسىندا، ەكس-مينيستر پروكۋرور كەلتىرگەن دايەكتەردىڭ ءبارى جالعان ەكەنىن مالىمدەدى.
ەلجان ءبىرتانوۆتىڭ ادۆوكاتتارى تەرگەۋشىلەر مەن پروكۋراتۋرا قىزمەتكەرلەرى وسى ىسكە سەبەپشى بولعان پلاتفورماعا قاتىستى قۇجاتتار اعىلشىن تىلىندە جازىلعاندىقتان تانىسپاعانىن ايتادى.
«ءبىزدى ايىپتاۋشى تاراپ اۋدارماعا قارسى بولسا، قۇجاتتا نە جازىلعانىن ءتۇسىنۋ ءۇشىن بارلىعىمىزدىڭ ءىستى ارى قاراي اعىلشىن تىلىندە جالعاستىرۋىمىزعا تۋرا كەلەدى. وندا پلاتفورمانىڭ جۇمىس ىستەپ تۇرعانى انىق ايتىلعان. قۇجاتتى اۋدارۋدان باس تارتقان پروكۋراتۋرا مەن تەرگەۋشىلەردىڭ ارەكەتى زاڭسىزدىق. وسىنى ەسكەرۋدى سۇرايمىن»، - دەيدى بۇرىنعى مينيستر ەلجان ءبىرتانوۆ.
ال قۇزىرلى ورگان وكىلى بۇگىنگى سوت وتىرىسىندا بۇل شەشىمنىڭ جوعارعى سوت ەرەجەسىنە قايشى كەلەتىنىن ايتتى. سوت وتىرىسى ەرتەڭ دە جالعاسادى.
«جوعارعى سوتتىڭ نورماتيۆتىك قۇقىقتىق اكتىلەرىندە ءىستى پروكۋرورعا قايتارۋ ءۇشىن نەگىزدەردىڭ ءتىزىمى بار ەكەنىنە نازار اۋدارامىن. ق ر قىلمىستىق ءىس جۇرگىزۋ كودەكسىنىڭ بىردە-ءبىر بابىندا كۇدىكتىنىڭ باس تارتۋىنا شاعىمدانۋ كەزەڭىندە قىلمىستىق ءىستى سوتقا جىبەرۋگە تىيىم سالۋ قاراستىرىلماعان. ونداي ەرەجە دە جوق»، - دەيدى پروكۋرور جانگەلدى ەسەبايەۆ.
ايتا كەتەيىك، بۇعان دەيىن سوت ەلجان ءبىرتانوۆتىڭ ءىسىن باس پروكۋراتۋراعا قايتارعان بولاتىن.