نۇر-سۇلتاندا ناۋرىز مەرەكەسىن تويلاۋ ماسەلەلەرى تالقىلانىپ جاتىر
شاراعا قازاقستان، تۇركيا جانە يران عالىمدارى مەن ساراپشىلارى جانە ديپلوماتتار قاتىسىپ جاتىر. «كونە زاماننان باستاۋ الاتىن وسىناۋ مەيرام جاڭارۋ مەن جاڭا ءومىردىڭ باستالۋ ءساتىن سيپاتتايدى. ناۋرىز - رۋحاني باي مۇرامىزدىڭ، بىرەگەي ۇلتتىق كودىمىز بەن ۇزدىكسىز ۇرپاق ساباقتاستىعىنىڭ جارقىن نىشانى. بۇل مەرەكە ومىرىمىزگە جاسامپازدىق پەن دامۋدىڭ جاڭا لەبىن اكەلەدى. بۇگىندە ناۋرىز - الەمدە دە، تۇركى دۇنيەسىندە دە، قازاقستان رەسپۋبليكاسىندا دا دوستىقتى، ءوزارا قۇرمەت پەن كەلىسىمدى نىعايتۋعا سەبەپشى جالپىحالىقتىق مەيرام»، - دەدى ەۋرازيا ۇلتتىق ۋنيۆەرسيتەتىنىڭ رەكتورى ەرلان سىدىقوۆ.
ءوز سوزىندە رەكتور قازاقستان رەسپۋبليكاسىنىڭ جاڭارۋ مەن جاڭعىرۋعا باعىت تۇزەگەنىن اتاپ ءوتتى.
«بايقاپ قاراساڭىزدار، ناۋرىزدىڭ فيلوسوفياسىندا دا وسى كونتسەپتسيا بار. بۇگىنگى كونفەرەنسيانىڭ ماقساتى - قازاقستاندا 1988 -جىلدان بەرى رەسمي مەرەكەلەنىپ كەلە جاتقان ناۋرىزدىڭ ءمانىن، 34 جىل ىشىندەگى تويلانۋ ەرەكشەلىگىن، شارانى وتكىزۋدەگى كەمشىلىكتەردى، وسى ماسەلەگە قاتىستى جاڭارتۋ جۇمىستارىن جۇرگىزۋدىڭ عىلىمي جانە تاجىريبەلىك نەگىزدەمەلەرىن زەردەلەۋ. سول ءۇشىن دە ناۋرىزدىڭ وتانى سانالاتىن يران يسلام رەسپۋبليكاسى ماماندارىن، وزىمىزبەن قاناتتاس تۇركىمەنستان، تاجىكستان ماماندارىن، وسى مەيرامدى سوڭعى جىلدارى اتاپ وتە باستاعان تۇركيا عالىمدارى مەن ناۋرىزدى يۋنەسكو دەڭگەيىنە كوتەرۋگە سەبەپشى ۇيىمداردىڭ ازاماتتارىن شاقىردىق. ءسوزىمنىڭ سوڭىندا ايتارىم: ناۋرىز - ىرگەسى سوگىلمەس بىرلىكتىڭ بەرەكەسى، ىرىسى توگىلمەس تىرلىكتىڭ مەرەكەسى. جاقسىلىقتىڭ جارشىسى، جاڭا جىلدىڭ باستاۋى - ناۋرىز مەيرامى تۋعان جەر توپىراعىنا قۇت- بەرەكە اكەلسىن! ەلىمىز تىنىش، تۋعان جەرىمىز امان بولىپ، ءاربىر جاڭا كۇن ءار وتباسىنا شات كوڭىل، باقىت جانە بەرەكە سىيلاسىن!» - دەدى ە. سىدىقوۆ.
اۆتور: ايجان سەرىكجان قىزى