كەڭەستىڭ جاڭا قۇرامىنا قوعامدىق بەلسەندىلەر، جاس عالىمدار مەن كاسىپكەرلەر، وڭىرلەر، اۋىل جانە شىعارماشىل جاستاردىڭ وكىلدەرى، «تاۋەلسىزدىك ۇرپاقتارى» گرانتىنىڭ يەگەرلەرى، پرەزيدەنتتىك جاستار كادر رەزەرۆىنىڭ مۇشەلەرى، ءتۇرلى جاستار ۇيىمدارىنىڭ كوشباسشىلارى كىردى.
ءوز سوزىندە ەرلان قارين مەملەكەت باسشىسى جولداۋىنىڭ نەگىزگى تەزيستەرىنە توقتالدى. ول پرەزيدەنت جاريالاعان جاڭا رەفورمالار مەملەكەتتىك قۇرىلىستىڭ كەزەكتى كەزەڭى، جاڭا قازاقستاندى قۇرۋ مەن جاڭا باستامالاردىڭ باستاۋى ەكەنىن اتاپ ءوتتى.
بۇل رەفورمالار ازاماتتار، اسىرەسە جاستار تاراپىنان ۇلكەن قولداۋعا يە بولىپ جاتىر. بۇل تۇرعىدا كەڭەستىڭ ءرولى ارتادى، ويتكەنى ونىڭ مۇشەلەرى زاڭ جوبالارىن، تۇجىرىمدامالاردى جانە باسقا دا ستراتەگيالىق قۇجاتتاردى تالقىلاۋعا قاتىسادى دەپ كوزدەلگەن.
قازىرگى ۋاقىتتا جاستار ساياساتى تۋرالى زاڭ جوباسى پارلامەنت ماجىلىسىندە قارالىپ جاتىر.
ە. قارين كەڭەس وكىلدەرىن ءماجىلىستىڭ جۇمىس توپتارىنىڭ قۇرامىنا كىرگىزۋدى ۇسىندى.
بۇدان باسقا، جاستار ساياساتى جونىندەگى كەڭەس جۇيەلى جۇمىس ىستەۋى ءۇشىن ونىڭ جانىنان ءتۇرلى كوميتەتتەر قۇرۋ جوسپارلانعان. بۇدان ءارى وتىرىستا ق ر پرەمەر- ءمينيسترىنىڭ ورىنباسارى ەرالى توعجانوۆ، ق ر ءبىلىم جانە عىلىم ءمينيسترى اسحات ايماعامبەتوۆ، ق ر ەڭبەك جانە الەۋمەتتىك قورعاۋ ءمينيسترى سەرىك شاپكەنوۆ جانە «جاستار» عىلىمي-زەرتتەۋ ورتالىعىنىڭ ديرەكتورى ءازيز ىسقاقوۆ بايانداما جاسادى.
كەزدەسۋ سۇراق-جاۋاپ فورماتىندا جالعاستى، كەڭەس مۇشەلەرى مەملەكەتتىك ورگانداردىڭ باسشىلارىنا ءوز ساۋالدارى مەن ۇسىنىستارىن جولدادى.