پرەزيدەنت: قازاقستاندا كونستيتۋتسيالىق سوت قۇرۋدى ۇسىنامىن

نۇر-سۇلتان. قازاقپارات - قازاقستاندا كونستيتۋتسيالىق سوت قۇرۋدى ۇسىنامىن.

بۇل تۋرالى مەملەكەت باسشىسى قاسىم-جومارت توقايەۆ قازاقستان حالقىنا جولداۋى بارىسىندا ءمالىم ەتتى، دەپ حابارلايدى قازاقپارات.

«مەن ەلىمىزدە كونستيتۋتسيالىق سوت قۇرۋدى ۇسىنامىن. باس پروكۋرور مەن ادام قۇقىعى جونىندەگى ۋاكىلگە دە كونستيتۋتسيالىق سوتقا جۇگىنۋ مۇمكىندىگىن بەرگەن ءجون. بۇل باستامالار ءادىل ءارى قۇقىقتىق مەملەكەت قۇرۋ جولىنداعى ماڭىزدى قادام بولادى دەپ سەنەمىن»، دەدى قازاقستان پرەزيدەنتى جولداۋ بارىسىندا.

«دەموكراتيا تاريحى دەگەنىمىز - ەڭ الدىمەن، سايلاۋ راسىمدەرىن جەتىلدىرۋ تاريحى. سونداي-اق، سايلاۋ زاڭنامالارىنىڭ ساقتالۋىن باقىلاۋ تاريحى دەۋگە بولادى. وسى ورايدا، مەن بايقاۋشىلاردىڭ قۇقىقتارى مەن جاۋاپكەرشىلىگى ناقتى بەلگىلەنۋگە ءتيىس دەپ سانايمىن»، دەدى قاسىم-جومارت توقايەۆ.

اۆتور: ايجان سەرىكجان قىزى