مىزعىماس بىرلىكتىڭ ارقاسىندا مەملەكەتىمىزدى قورعاپ قالدىق - پرەزيدەنت
بۇل تۋرالى ق ر پرەزيدەنتى قاسىم-جومارت توقايەۆ قازاقستان حالقىنا جولداۋىندا ايتتى، دەپ حابارلايدى قازاقپارات ءيتىلشىسى.
«بۇگىنگى جولداۋدىڭ ءمان-ماڭىزى ايرىقشا. ونىڭ ارقالايتىن جۇگى ءبىر جىلمەن شەكتەلمەيدى، اۋقىمى كەڭ، مازمۇنى دا بولەك. ءبىز الدىمىزعا بيىك ماقساتتار قويىپ وتىرمىز. وزدەرىڭىزبەن بىرگە جاڭا قازاقستاندى قۇرۋعا كىرىستىك. بارشاڭىزعا ءمالىم، بىلتىر ەگەمەندىكتىڭ ماڭىزدى بەلەسىنە جەتتىك. تاريحي ولشەممەن قاراعاندا 30 جىل تىم كوپ ۋاقىت ەمەس. حالقىمىز تۇڭعىش پرەزيدەنت نۇرسۇلتان نازاربايەۆتىڭ باسشىلىعىمەن وسى كەزەڭدە اۋقىمدى جۇمىس اتقاردى. كوپتەگەن تابىستارعا قول جەتكىزدى. الايدا، بەرەكە-بىرلىگىمىزدى ساقتاماساق، جەتىستىكتەرىمىزدىڭ بارىنەن ايرىلىپ قالۋىمىز مۇمكىن»، - ددەدى مەملەكەت باسشىسى.
ق ر پرەزيدەنتى قاڭتارداعى دۇربەلەڭ كەزىندە بۇعان كوزىمىز انىق جەتكەنىن باسا ايتتى. «بۇل وقيعالار بۇكىل قوعامدى ءدۇر سىلكىندىردى. حالقىمىز بۇرىن-سوڭدى بولماعان قاۋىپ-قاتەرمەن بەتپە-بەت كەلدى. مەملەكەتىمىزدىڭ تۇتاستىعىنا جانە ەگەمەندىگىمىزگە زور قاۋىپ ءتوندى. وسى كۇندەردە جۇرتىمىز تاۋەلسىزدىكتىڭ قادىر-قاسيەتىن جان-جۇرەگىمەن سەزىندى. تاتۋلىق پەن تۇراقتىلىق، تىنىشتىق پەن بەيبىتشىلىك قانشالىقتى ماڭىزدى ەكەنىن جەتە ءتۇسىندى. ءبىز مىزعىماس بىرلىكتىڭ ارقاسىندا مەملەكەتىمىزدى قورعاپ قالدىق ۋاقىتى جانە باتىل شەشىم قابىلداپ، لاڭكەستەرگە تويتارىس بەردىك. مەن قاشاندا ءبارىن اشىق ايتىپ ءجۇرمىن. ىندەت كەزىندە قالىپتاسقان احۋال جونىندە جۇرتشىلىققا ۇنەمى اقپارات بەرىپ وتىردىم»، - دەدى قاسىم-جومارت توقايەۆ.
اۆتور: مارلان جيەمباي