ورتاق ۆاليۋتا تەڭگەنى السىرەتۋى مۇمكىن - ەكونوميستەر
كەشە وداقتىڭ تەلەگرام-كانالىندا ەۋرازيالىق ەكونوميكالىق كوميسسيانىڭ ينتەگراتسيا جانە ماكروەكونوميكا ءمينيسترى سەرگەي گلازيەۆكە سىلتەمە جاساپ، وسىنداي اقپارات تارادى. الايدا كەشىرەك بۇل مالىمەت سايتتان الىنىپ تاستالدى. قالاي بولعاندا دا بۇل باستامانى قازاقستان قولدامايدى. ەكونوميست ماقسات حالىقتىڭ سوزىنشە، ءبىز ە ا ە و اياسىندا بولۋى مۇمكىن ورتاق ۆاليۋتانىڭ وزىنە قارسىمىز. قازىر ەلىمىز ءۇشىن ىشكى نارىقتى، ەكونوميكالىق قاۋىپسىزدىكتى ويلاۋ قاجەت. ەڭ باستىسى يمپورتقا تاۋەلدىلىكتەن قۇتىلۋ ماڭىزدى. ەكونوميستى رەسەيگە سالىنعان سانكسيالاردىڭ قازاقستانعا كەرى اسەر ەتىپ جاتقانى ويلاندىرادى. بانك جونىندەگى تاۋەلسىز ساراپشى نۇرجان بياقايەۆ تا بۇل باستاماعا كەلىسۋگە بولمايدى دەيدى. ويتكەنى تەڭگەنىڭ ەركىندىگىنە زيان كەلۋى مۇمكىن. رۋبلگە تاۋەلدى بولعان سايىن ەكونوميكامىز السىرەي بەرەدى دەيدى ساراپشى.
ماقسات حالىق، ەكونوميست:
- بىزگە ەشقانداي دا ورتاق ۆاليۋتاعا قوسىلۋدىڭ قاجەتتىلىگى جوق. ءتىپتى، قىتاي مەن رەسەي سياقتى مەملەكەتتەرمەن قانداي دا ءبىر ەكونوميكالىق تۇرعىدا بولسىن وسىنداي ورتاق ۆاليۋتالىق جوبالارعا قوسىلاتىن بولساق، ءبىز الەمدىك قاۋىمداستىقتان، قارجىلىق جۇيەدەن سانكتسيا تىلەپ العان بولامىز. سوندىقتان ويلايمىن، قازىرگى ۋاقىتتا مۇنداي قادامدى مۇلدە جوق دەپ ايتۋ كەرەك.
نۇرجان بياقايەۆ، بانك جونىندەگى تاۋەلسىز ساراپشى:
- وسى 30 جىلدا ەلىمىزدىڭ يمپورتقا تاۋەلدىلىكتەن تولىق ارىلۋىنا مۇمكىندىگى بار ەدى. مەن ونى ۇنەمى ايتامىن. رەسەيدەن تاۋار الۋ، ونىڭ ۆاليۋتاسىنىڭ ىعىنا جىعىلا بەرۋگە بولمايدى. بۇل تەك وتاندىق وندىرۋشىلەردى قولداۋ ارقىلى جۇزەگە اسادى. وسىلاي جاساساق قانا تەڭگەنى نىعايتا الامىز. ال ورتاق ۆاليۋتا ماسەلەسىنە مەن تۇبەگەيلى قارسىمىن. بۇل باستاما قازاقستان ءۇشىن ءتيىمسىز. قازىرگى اسكەري قاقتىعىس كەزىندە بۇل رەسەيلىك ءرۋبلدى ساقتاپ قالۋ ءۇشىن كەرەك. ال قازاقستان مەن ۇلتتىق ۆاليۋتامىز ءۇشىن مۇنداي قاجەتتىلىك جوق قازىر. بۇل جوبانى قولدايتىن بولساق، قارجىلىق ەركىندىك بويىنشا قۇزىرىمىزدى جوعالتۋىمىز مۇمكىن.
24.kz