رەسەيگە سالىنعان سانكسيالار وتاندىق بيزنەسكە قالاي اسەر ەتىپ جاتىر - ۇ ك پ

نۇر-سۇلتان. قازاقپارات - رەسەي فەدەراتسياسىنا سالىنىپ جاتقان سانكسيالاردىڭ قازاقستاننىڭ بيزنەس سالاسىنا قانداي اسەرىن تيگىزىپ جاتىر.

بۇل تۋرالى «اتامەكەن» ۇلتتىق كاسىپكەرلەر پالاتاسىنىڭ نۇر-سۇلتان قالاسى بويىنشا فيليالى ديرەكتورىنىڭ مىندەتىن اتقارۋشى بەيسەن جولبولديەۆ ايتىپ بەردى، دەپ حابارلايدى قازاقپارات ءتىلشىسى.

«رەسەيگە سالىنىپ جاتقان سانكسيالارعا بايلانىستى ۇلتتىق كاسىپكەرلەر پالاتاسى جانىنان جەدەل شتاب قۇرىلىپ، جۇمىس ىستەپ جاتىر. وسى ۋاقىتقا دەيىن كاسىپكەرلەردەن 377 بيزنەس ماسەلەسى بويىنشا سۇراقتار كەلىپ ءتۇستى. ماسەلەلەردىڭ دەنى لوگيستيكامەن بايلانىستى. ياعني ازىق- تۇلىك، مەديتسينالىق ونىمدەر، قۇرىلىس ماتەريالدارىن جەتكىزۋگە قاتىستى قيىندىقتار. سونىمەن قاتار اقشا اۋدارىمىنا دا قاتىستى تۇيتكىلدى جايتتار بار. ودان بولەك، كوپتەگەن كاسىپكەرلەر رەسەي مەن بەلارۋس شەكاراسىنان جۇكتەرىن وتكىزە الماي الەك بولىپ جاتىر. ولاردىڭ قاتارىندا قۇبىرلار، قاعاز، تەمىر، قۇرىلىس ماتەريالدارى جانە مەديتسينالىق ونىمدەر بار»، - دەدى بەيسەن جولبولديەۆ «اتامەكەن» ۇ ك پ-دا ونلاين وتكەن باسپا ءسوز ءماسليحاتىندا.

سونداي-اق، «اتامەكەن» ۇ ك پ وكىلى دوللاردىڭ ءوسۋى كەيبىر بيزنەس كەلىسىمشارتتارىنا قاۋىپ تونگىزگەنىن ايتتى.

«2021 -جىلى جاسالعان كەيبىر كەلىسىمشارتتىڭ ورىندالماۋ قاۋپى بار. سەبەبى كەلىسىم بىلتىر دوللاردىڭ باعاسى 435 تەڭگە كەزىندە جاسالدى. ال قازىر دوللار 510 تەڭگەگە جەتىپ وتىر. وسى تۇستا كاسىپكەرلەر كوتەرگەن ءار ماسەلە جەدەل شتابتا قارالاتىن بولادى»، - دەيدى ول.

بۇعان دەيىن حابارلاعانىمىزداي رەسەيگە سالىنىپ جاتقان سانكسيالاردىڭ وتاندىق بيزنەستىڭ دامۋىنا اسەرىنە بايلانىستى كاسىپكەرلەرگە ارنالعان جەدەل شتاب قۇرىلدى.

اۆتور: ءالي يبرايەۆ