ۋكراينادان ءۇش ميلليون ادام كەتتى
بۇل دۇنيەجۇزىلىك دەنساۋلىق ساقتاۋ ۇيىمىنىڭ بەرگەن مالىمەتى. قازىر بۇل ۇيىم ۋكرايناعا گۋمانيتارلىق كومەك جەتكىزۋ ىسىندە بەلسەندى اتسالىسۋدا. ايماققا قاجەتتى ءدارى- دارمەك، ونىڭ ىشىندە ينسۋلين، وتتەگى، حيرۋرگيالىق قۇرال- جابدىق، قان قۇيۋعا ارنالعان مەديتسينالىق زاتتار مەن وزگە دە پرەپاراتتاردى جەتكىزىپ جاتىر. ال ۇلى بريتانيانىڭ دەنساۋلىق ساقتاۋ ءمينيسترى سادجيد دجاۆيد رەسەي اسكەرىنىڭ ۋكراينا اۋرۋحانالارىنا جاساعان شابۋىلىن «اسكەري قىلمىس» دەپ اتادى. Sky News تەلەارناسىندا بەرگەن سۇحباتىندا ۋكرايناداعى قاقتىعىستان 31 مەديتسينالىق مەكەمە قيراعانىن ءمالىم ەتتى.
سادجيد دجاۆيد ۇلى بريتانيا دەنساۋلىق ساقتاۋ ءمينيسترى:
- دۇنيەجۇزىلىك دەنساۋلىق ساقتاۋ ۇيىمىنىڭ مالىمەتى بويىنشا ۋكرايناداعى 31 مەديتسينالىق مەكەمەگە شابۋىل جاسالعانىن بىلەمىز. بۇنى دالەلدەيتىن ءتيىستى قۇجاتتار بار. بۇل اسكەري قىلمىس! پۋتين بۇل ءىس ءۇشىن جاۋاپقا تارتىلادى.
وسىعان دەيىن ۇلى بريتانيادان ۋكرايناعا 400 ميلليون فۋنت ستەرلينگ كومەك ءبولىندى. بۇدان بولەك، قوسىمشا ءدارى دارمەك تيەلگەن ۇشاقتار جونەلتىلدى. بۇگىن ايماققا 8 رەيس اتتاندى. پولشا مەن مولدوۆا ۇكىمەتىمەن ۇنەمى بايلانىستامىز.
www.24.kz