ءبىر قاراعاندا، رەسەي قارىز مىندەتتەمەسىن وتەۋگە نيەتتى بولعانىمەن، ونى تولەۋدىڭ «جىمىسقى»، «ايلاكەر» جولىن قولدانعالى وتىر.
ناقتىراق ايتساق، رەسەي ۇكىمەتى قۇندى قاعازداردى ساتىپ العان شەتەلدىك كومپانيالارعا قارىزدى ەۋروپا مەن ا ق ش- تا بۇعاتتالىپ قالعان ەلدىڭ التىن- ۆاليۋتا قورىنىڭ ەسەبىنەن قايتارۋ تۋرالى قۇجاتقا قول قويدى. ال ينۆەستورلار بۇدان باس تارتسا، وندا رۋبلمەن قايتارامىز دەپ قوقاي سالدى.
ر ف قارجى مينيسترلىگىنىڭ بۇل حابارلاماسىن ينتەرفاكس جازدى.
«رەسەي فەدەراتسياسىنىڭ ەۋرووبليگاتسيالار بويىنشا مەملەكەتتىك قارىز مىندەتتەمەلەرىن ورىنداۋ ءۇشىن قارجى مينيسترلىگى اگەنت بانكتەرگە ءتيىستى ەميسسيالىق قۇجاتتامادا قاراستىرىلعان ۆاليۋتالىق تولەمدەر مەن مەرزىمدەردى جۇزەگە اسىرۋ ءۇشىن تولەم وتىنىمدەرىن بەرەدى. ەگەر شەتەلدىك كوررەسپوندەنت بانك ەۋرووبليگاتسيالار بويىنشا تولەم تاپسىرماسىن ورىنداماسا، قارجى مينيسترلىگى ەۋرووبليگاتسيالار بويىنشا تولەمدەردى رەسەي بانكىنىڭ تولەم كۇنگى باعامى بويىنشا رۋبلمەن قايتارىلادى»، - دەلىنگەن اقپاراتتا.
ايتا كەتەيىك، رەسەي ۋكراينا جەرىنە اسكەري وپەراتسيا باستاپ، باسىپ كىرگەننەن كەيىن ا ق ش پەن ەۋرووداق ەلدەرى رەسەيگە قارسى بىرنەشە سانكسيا سالىپ، ر ف ورتالىق بانكىنىڭ شەتەلدىك بانكتەردەگى التىن-ۆاليۋتا قورىن تولىقتاي بۇعاتتاپ تاستاعان ەدى. ءتىپتى، جاپونيا، ۇلى بريتانيا مەن شۆەيتساريا دا رەسەيدىڭ التىن قورىن قۇلىپتاپ تاستادى.
ەندى ر ف باتىس ەلدەرىنىڭ ءادىسىن وزىنە قارسى قولدانىپ، «شەتەلدىك قارىزدى قايتارىپ بەرۋگە دايىنبىز، ءبىراق ولار ءبىزدىڭ بۇعاتتالىپ قالعان ەسەپشوتتارىمىزدان السىن» دەگەندەي سىڭاي تانىتىپ وتىر.
ال ر ف پرەزيدەنتى ۆ. پۋتين 6- ناۋرىز كۇنى شەتەلدىك قارىزدى رۋبلمەن قايتارۋ تۋرالى قاۋلىعا قول قويعان ەدى.