قاڭتار وقيعاسىنا قاتىستى تەرگەۋ قالاي ءجۇرىپ جاتىر
بۇل تۋرالى ق ر باس پروكۋراتۋراسى ارنايى پروكۋرورلار قىزمەتىنىڭ باسشىسى ريزابەك وجاروۆ ءمالىم ەتتى، دەپ حابارلايدى قازاقپارات ءتىلشىسى.
«قاڭتار وقيعاسىنا دەيىن تاۋەلسىز قازاقستان تاريحىندا بۇنداي اۋقىمدى وقيعا بولعان ەمەس. مىڭداعان ادامنان قاڭتار وقيعاسىنا كۋا نەمەسە قاتىسۋشى رەتىندە جاۋاپ الىندى. قىلمىستىق پروتسەسۋالدىق كودەكستە كورسەتىلگەن مەرزىمگە سايكەس ءبىز 2 ايدىڭ ىشىندە ءىستىڭ اق-قاراسىن انىقتاپ ۇلگەرە المايمىز. ايتا كەتەيىك، ۇرلىق-قارلىق سەكىلدى قىلمىستىڭ ءوزى ايلاپ تەرگەلەدى. ال بۇل جەردە ادام ءولىمى بار. قىلمىستىق پروتسەستە باستى ماڭىزدى نارسە - اقيقات»، - دەدى ريزابەك وجاروۆ «Qazaqstan» ۇلتتىق تەلەارناسىنىڭ «Ashyq ala ń « قوعامدىق- ساياسي توك-شوۋىنىڭ ەفيرىندە.
ونىڭ ايتۋىنشا، كەز كەلگەن قىلمىستىق ءىستى اشىق ءارى وبەكتيۆتى تۇرعىدا تەرگەۋ كەرەك.
«سونداي-اق، ءبىز قاتىسۋشىلاردى تەرگەپ قانا قويماي، ولاردىڭ قۇقىعىن قورعاۋىمىز كەرەك. سوندىقتان قاڭتار وقيعاسىنا قاتىستى تەرگەۋ ءبىراز جۇرەدى. قوعام وعان دايىن بولۋى كەرەك. 2 ايدىڭ ىشىندە «بىزدە مىناداي دالەل بار، وقيعا وسىلاي بولدى، مىناۋ - قاتىسۋشىلار، ال مىنالار - ۇيىمداستىرۋشىلار» دەپ قازىر ايتا المايمىز. تەرگەۋ پروتسەسىنە قاتىستى ەشقانداي كەدەرگى جوق. جۇمىستى جەدەلدەتۋ ءۇشىن stopterrorism سايتى جۇمىس ىستەپ تۇر. بۇگىنگە دەيىن ازاماتتاردان 1728 فايل كەلىپ ءتۇستى. ۆيدەو-فوتولار ءالى دە كەلىپ جاتىر. وسى تۇستا ايتىپ وتەتىن تاعى ءبىر جايت - جاپپاي تارتىپسىزدىك كەزىندە بۇزاقىلار 824 بەينەباقىلاۋ كامەراسىن قيراتقان»، - دەيدى ول.