مينيستر قاڭتار وقيعاسىنا دەيىن پوليتسيا مەن نارازىلىق بىلدىرۋشىلەردىڭ اراسى قانداي بولعانىن ايتتى
بۇل تۋرالى ماجىلىستە ق ر ىشكى ىستەر ءمينيسترى مارات احمەتجانوۆ ايتتى، دەپ حابارلايدى قازاقپارات ءتىلشىسى.
«وزدەرىڭىز بىلەسىزدەر، 2020 -جىلى «بەيبىت جينالىستار تۋرالى» جاڭا زاڭ كۇشىنە ەندى. ميتينگ ۇيىمداستىرۋ پروتسەسى «رۇقسات بەرۋ» جۇيەسىنەن «حابارلاما» قاعيداتىنا كوشتى. وسىعان وراي، پوليتسيانىڭ قوعامدىق ءتارتىپتى قامتاماسىز ەتۋ ادىستەرى وزگەردى. پوليتسيا قىزمەتكەرلەرى ميتينگ وتەتىن اۋماققا جاقىن جەردە ورنالاسادى. قارۋ مەن ارنايى قۇرالداردى قولدانبايدى. جينالعاندارمەن تىكەلەي قارىم-قاتىناستى تەك اكىمدىك وكىلدەرى عانا جۇزەگە اسىرادى»، - دەدى مينيستر.
ونىڭ اتاپ وتۋىنشە، پوليتسيا ميتينگتى توقتاتۋ ءۇشىن ازاماتتاردىڭ ءومىرى مەن دەنساۋلىعىنا، قوعامدىق تارتىپكە ءقاۋىپ تونگەن، مۇلىككە زالال كەلتىرۋ، الەۋمەتتىك، ناسىلدىك، ءدىني الاۋىزدىقتى قوزدىرۋ؛ كونستيتۋتسيالىق قۇرىلىستى، ايماقتىق تۇتاستىقتى كۇشپەن قۇلاتۋعا شاقىرۋ فاكتىلەرى ورىن العان جاعدايلاردا عانا تارتىلادى.
«جاڭا زاڭ كۇشىنە ەنگەننەن باستاپ، پوليتسيا مەن نارازىلىق بىلدىرۋشىلەردىڭ اراسىندا ەشقانداي قاقتىعىس بولماعان. تۋرا وسى الگوريتم قاڭتار وقيعالارىنىڭ العاشقى كۇندەرىندە دە قولدانىلدى»، - دەدى مارات احمەتجانوۆ.
اۆتور: مارلان جيەمباي