كوكشەتاۋداعى قانتقا تالاس: اكىمدىك تۇسىنىك بەردى

كوكشەتاۋ. قازاقپارات - الەۋمەتتىك جەلىدە كوكشەتاۋداعى ءىرى ساۋدا ورىندارىندا جۇرتتىڭ جاپپاي قانت ساتىپ الىپ جاتقانى تۋرالى ۆيدەو تارادى.

وسىعان بايلانىستى اقمولا وبلىسىنىڭ كاسىپكەرلىك جانە تۋريزم باسقارماسى تۇسىنىك بەردى، دەپ حابارلايدى قازاقپارات ءتىلشىسى.

«اقمولا وبلىسىنىڭ كاسىپكەرلىك جانە تۋريزم باسقارماسى قازىرگى ۋاقىتتا كوتەرمە ساۋداعا «تاراز قانت زاۋىتى» ج ش س- دە وندىرىلگەن قانت ءتۇسىپ جاتقاندىعىن حابارلايدى. وندا بۇگىنگى كۇنى ساتۋ باعاسى 1 كەلىسى ءۇشىن 390 تەڭگەنى قۇرايدى. سونداي-اق كوتەرمە ساۋدا قويمالارى مەن بولشەك ساۋدا كاسىپورىندارىندا قانت پەن باسقا دا تاۋارلاردىڭ جەتكىلىكتى مولشەرى بار، قورلاردى تولتىرۋ اعىمداعى رەجيمدە جۇرگىزىلەدى. وڭىرلىك تۇراقتاندىرۋ قورىن قالىپتاستىرۋ ءۇشىن «ازىق-تۇلىك كەلىسىم شارت كورپوراتسياسى» ۇ ك» ا ق قانت ساتىپ الۋ جۇمىستارىن جۇرگىزۋدە، وسى اپتادا 100 توننا قانت ءتۇستى.

بۇدان باسقا، «KOKSHE- MARKET» الەۋمەتتىك دۇكەندەرىندە بۇرىن ساتىپ الىنعان (قالعان 20 توننا) قانت 1 كەلىسى 320 تەڭگە باعادا ساتىلىپ جاتىر (الىپساتارلىققا جول بەرمەۋ ماقساتىندا قانتتى ءبىر قولعا جىبەرۋ كولەمى بويىنشا شەكتەۋ بەلگىلەنەدى)»، - دەپ ءتۇسىندىردى اقمولا وبلىسىنىڭ كاسىپكەرلىك جانە تۋريزم باسقارماسىنان.

سونىمەن بىرگە باسقارما باسشىلىعى ازاماتتاردان ارانداتۋشىلىق حابارلامالارعا بوي الدىرماۋدى جانە دۇرلىكپە جاساماۋدى سۇرايدى.

ايتا كەتسەك، الەۋمەتتىك جەلىلەردە كوكشەتاۋ قالاسىنداعى ءىرى ساۋدا جەلىلەرىندە جۇرتتىڭ جاپپاي قانت ساتىپ الىپ جاتقىنى تۋرالى اقپارات تاراعان ەدى.

بەينەجازبادان ادامداردىڭ دۇكەن سورەلەرىندەگى قانتقا تالاسىپ جاتقانىن كورۋگە بولادى.