جانىبەك ءالىمحان ۇلى الەم چەمپيونى تيتۋلى ءۇشىن كىممەن ايقاساتىنى بەلگىلى بولدى

نۇر-سۇلتان. قازاقپارات - دۇنيەجۇزىلىك بوكس ۇيىمى (WBO) قازاقستاندىق بوكسشى جانىبەك ءالىمحان ۇلى مەن بريتاندىق دەنني ديگنۋمنىڭ جەكپە-جەگىنە رۇقسات بەردى، دەپ حابارلايدى قازاقپارات Sports.kz سايتىنا سىلتەمە جاساپ.

WBO ءوزىنىڭ سايتىندا ءالىمحان ۇلى مەن ديگنۋمنىڭ كوماندالارىنا ورتا سالماق ساناتىنداعى الەم چەمپيونىنىڭ ۋاقىتشى تيتۋلى ءۇشىن جەكپە-جەك تۋرالى كەلىسۋ كەرەكتىگىن حابارلادى.

تاراپتارعا ول ءۇشىن ون كۇن بەرىلەدى. بوكسشىلار كەلىسە الماعان جاعدايدا، پروموۋتەرلىك ساۋدا تاعايىندالادى.

ونىڭ مينيمالدى ستاۆكاسى 200 مىڭ دوللار بولماق. بۇدان بۇرىن ورتا سالماقتاعى WBO چەمپيونى امەريكالىق ەسكيۆا فالكو مەن مەكسيكالىق حايمە مۋنگيا الىمحان ۇلىمەن ايقاسۋدان باس تارتتى.

دەنني ديگنۋم - WBO نۇسقاسى بويىنشا ورتا سالماقتاعى ەۋروپا چەمپيونى، ۇيىم رەيتينگىندە بەسىنشى ورىندا. ال ءالىمحان ۇلى - ورتا سالماقتاعى WBO رەيتينگىندە ەكىنشى ورىندا.