قىزىلوردادا ادام قاعىپ ولتىرگەن پوليتسيا قىزمەتكەرى ۇستالدى
وقيعا قىزىلوردا وبلىسى جاڭاقورعان كەنتىندەگى ورتالىق كوشەلەردىڭ بىرىندە بولدى. بەلگىسىز اۆتوكولىك جاياۋ جۇرگىنشىنى قاعىپ، وقيعا ورنىنان بوي تاسالاپ كەتكەن.
جول-كولىك وقيعاسىنان ءبىر ادام كوز جۇمدى. بۇل دەرەك بويىنشا ق ر قىلمىستىق كودەكسىنىڭ 345-بابى جانە 347-بابى بويىنشا سوتقا دەيىنگى تەرگەپ - تەكسەرۋ ارەكەتتەرى جۇرگىزىلۋدە.
وندا كولىك قۇرالدارىن باسقاراتىن ادامداردىڭ جول ءجۇرىسى نەمەسە كولىك قۇرالدارىن پايدالانۋ قاعيدالارىن بۇزۋى، جول-كولىك وقيعاسى بولعان جەردەن كەتىپ قالۋ جاعدايلارى كورسەتىلگەن.
«پوليتسيا قىزمەتكەرلەرىمەن جۇرگىزىلگەن جەدەل-ىزدەستىرۋ شارالارىنىڭ ناتيجەسىندە جول-كولىك وقيعاسىن جاساعان كۇدىكتى رەتىندە پوليتسيا قىزمەتكەرى انىقتالدى. ول ۋاقىتشا ۇستاۋ يزولياتورىنا قامالىپ، تەرگەۋ ارەكەتتەرى جالعاسۋدا. كىنالى پوليتسيا قىزمەتكەرى قۇقىق قورعاۋ ورگاندارىنان شىعارىلدى. سونداي-اق، اۋداندىق پوليتسيا ءبولىمىنىڭ باسشىلىعىنا قاتىستى قىزمەتتىك تەكسەرۋ جۇرگىزىلدى. تارتىپتىك كەڭەس شەشىمىمەن ءبىرقاتار باسشىلار تارتىپتىك جاۋاپكەرشىلىككە تارتىلدى»، - دەپ ءمالىم ەتتى قىزىلوردا وبلىستىق پوليتسيا دەپارتامەنتىنەن.
ەسكە سالساق، بۇدان بۇرىن قىزىلوردادا ادام ولتىرۋگە وقتالعان كۇدىكتى قولعا ءتۇستى.