قازاقستان - مەنىڭ جەرۇيىعىم: قازاقستانداعى ورىس حالقى جاڭا فلەشموب باستادى
«قازاقستانداعى ورىس ۇلتى! اقپاراتتىق سوعىسقا قازاقستاننىڭ كوپۇلتتى الەمىن قۇرتۋعا جول بەرمەيىك. ءبىز ءوز جەرۇيىعىمىزدى ەشقاشان ساتپايمىز! كەي ادامدار قازاقستانداعى ورىستاردى نەدەن قۇتقارعىسى كەلەدى؟ مول داستارحاننان، كىشكەنتايدان وسىرگەن اجەلەردىڭ قۇشاعىنان، ۇلى قازاق حالقىنىڭ شەكسىز مەيىرىمى مەن دانالىعىنان با... ءبىز قازاق ءتىلىن ۇيرەنۋگە دايىنبىز، ۇيرەنىپ تە ءجۇرمىز، ويتكەنى ءبىز قازاقتارىمىزدى شىن جۇرەكپەن جانە جان-تانىمىزبەن جاقسى كورەمىز. جاڭا مەكتەپتەر اشىلىپ جاتقانىنا وتە قۋانىشتىمىز جانە قازاق ءتىلى ءبىز ءۇشىن ەش قيىندىق تۋدىرمايدى! ەڭ باستىسى، ى. التىنسارين ايتقانداي «كەل، بالالار، وقىلىق» دەيمىز. ءبىز بالالاردىڭ بەيبىتشىلىك تۋرالى ءبىلىم العانىن قالايمىز! سوندىقتان «قازاقستان - مەنىڭ جەرۇيىعىم» فلەشموبىن باستايمىن»، - دەپ جازدى الەكساندرا مىسكينا Facebook پاراقشاسىندا.
جەلى قولدانۋشىلارى جاڭا فلەشموبتى بىردەن قولدادى جانە العىس ايتقاندار دا بار.
«ەلىمدى قالاي جاقسى كورەتىنىم تۋرالى پوست جازعانىم ءۇشىن جۇزدەگەن ادام راحمەت ايتتى. نە ءۇشىن؟ ءومىر بويى بىرگە جاساعان ادامدار مەن ولكەنى قۇرمەتتەپ، جاقسى كورەتىنىم ءۇشىن راحمەت ايتۋدىڭ قاجەتى بار ما؟ بۇل مەنىڭ پارىزىم، ارينە، باسقاشا بولۋى مۇمكىن ەمەس... ءبىراق بۇل ماعان قازاقستانداعى ورىستاردىڭ قولداۋى قازاقتار ءۇشىن قانداي ماڭىزدى ەكەنىن جانە كەرەك ەكەنىن تاعى دا كورسەتتى! جىلى لەبىز جازعانداردىڭ بارلىعىنا راحمەت»، - دەپ جاۋاپ بەردى الەكساندرا مىسكينا.
جاس ءانشى الەكساندرا بروسلاۆسكايا دا اتالعان فلەشموبقا قوسىلدى.
«مەن ءوز قازاقستانىمدى، مادەنيەتىمدى، ۇلتتىق كيىمدەرىمدى جاقسى كورەمىن. مۇندا بارلىق ادامدارعا ءوز انىمنەن ءۇزىندى جازعىم كەلەدى: «نە بۋدەت تەسنو ليۋديام رازنىح ناتسي، تسۆەتي موي كازاحستان، تسۆەتي»، - دەپ جازدى ءانشى.
سونىمەن بىرگە، جەلى قولدانۋشىسى اندرەي زۋبوۆ ءوز دوستارىن فلەشموبقا قاتىسۋعا شاقىردى.
«قازاقستانداعى ورىستار! قوسىلىڭىزدار! اقپاراتتىق سوعىسقا قازاقستاننىڭ كوپۇلتتى الەمىن قۇرتۋعا جول بەرمەيىك. ءبىز ءوز جەرۇيىعىمىزدى ەشقاشان ساتپايمىز! #قازاقستان مەنىڭ جەرۇيىعىم»، - دەيدى اندرەي زۋبوۆ.
«شانىراك Food» جوباسىنىڭ اۆتورى جانە جۇرگىزۋشىسى دميتري كۋتسەل دە ناۋقان تۋرالى ءوز پىكىرىن ءبىلدىردى.
«الەكساندرانىڭ «قازاقستان - مەنىڭ جەرۇيىعىم» فلەشموبىن قولدايمىن، ءوزىم الماتىدا تۋىپ-ءوستىم. ءيا، ماعان ورىستان شىققان قازاق تەرمينى ۇنايدى! دوستارىم مەنى نايمان دەپ اتايدى جانە مەن ونى ماقتان تۇتامىن! ءبىر-ءبىرىمىزدىڭ پىكىرىمىزدى قۇرمەتتەيىك، مەن سىزدەردىڭ پىكىرلەرىڭىزدى قۇرمەتتەيمىن، سىزدەر دە قۇرمەت تانىتىڭىزدار، ەگەر كەلىسپەسەڭىز، ۇستانىمىڭىزدى ەش قورلاۋسىز ءبىلدىرىڭىز»، - دەپ جازدى دميتري كۋتسەل.
Instagram جەلىسىنىڭ كريستينا ەسىمدى قولدانۋشىسى حالىقارالىق وقيعالارعا قاتىستى پىكىرىن ءبىلدىردى.