ديزەل مەن بەنزين قىمباتتاپ بارادى

بريۋسسەل. قازاقپارات - بەلگيادا ديزەل مەن بەنزين باعاسىنىڭ ءوسۋى تۇتىنۋ تاۋارلارىنىڭ قىمباتتاۋىنا اسەر ەتىپ جاتىر.

بۇل تۋرالى بەلگيا كولىك قىزمەتكەرلەرىنىڭ مۇددەلەرىن ۇسىناتىن Febetra ۇيىمى ءمالىم ەتتى، دەپ حابارلايدى قازاقپاراتتىڭ مەنشىكتى ءتىلشىسى.

قازىرگى كەزدە ۋكرايناداعى جاعدايعا بايلانىستى ەنەرگەتيكالىق نارىقتا باعا ءوسىپ جاتىر. مىسالى، جۇما كۇنى بەلگيادا ديزەل وتىنىنىڭ باعاسى 2,0840 ەۋروعا دەيىن ءوستى. اتالعان وتىننىڭ باعاسى ءبىرىنشى رەت ەكى دوللاردان اسىپ وتىر. سونىمەن قاتار بەنزين باعاسى دا وسۋدە. ەلدە اي-95 بەنزيننىڭ ءبىر ءليترى 1,98-2,10 ەۋروعا جەتتى.

«وسىعان بايلانىستى تاسىمالداۋشىلار قىزمەتتەرىنىڭ باعاسىن كوتەرۋگە ءماجبۇر بولىپ وتىر»، - دەدى Febetra ۇيىمىنىڭ ديرەكتورى فيليپپ دەگراەف.

ونىڭ ايتۋىنشا، بەلگيا ۇكىمەتى جانارماي بەكەتتەرىندە باعا شەگىنە جەتكەن جاعدايدا، ديزەل وتىنىنىڭ اكسيزىن تومەندەتۋگە ۇسىنىس جاسادى.

بەلگيا سۋپەرماركەتتەرىندە باعا 2020-جىلدىڭ باسىمەن سالىستىرعاندا، 2022 -جىلدىڭ العاشقى اپتالارىندا ونسىز دا %3-5 عا كوتەرىلگەن.

«ەكونوميكالىق احۋالعا بايلانىستى بۇگىنگى كۇنى باعا وتكەن جىلمەن سالىستىرعاندا ەداۋىر وسكەن - كەرى جاعدايدا پايدا تابۋ مۇمكىن بولماي قالار ەدى»، - دەدى ف. دەگراەف.