قاسىم-جومارت توقايەۆ كورەيا رەسپۋبليكاسىنىڭ جاڭادان سايلانعان پرەزيدەنتىن قۇتتىقتادى
19:19, 10 - ناۋرىز 2022
نۇر-سۇلتان. قازاقپارات - مەملەكەت باسشىسى كورەيا رەسپۋبليكاسىنىڭ جاڭادان سايلانعان پرەزيدەنتىن قۇتتىقتادى، دەپ حابارلايدى قازاقپارات اقوردانىڭ رەسمي سايتىنا سىلتەمە جاساپ.
قاسىم-جومارت توقايەۆ يۋن سوك ەلدى كورەيا رەسپۋبليكاسىنىڭ پرەزيدەنتى لاۋازىمىنا سايلانۋىمەن قۇتتىقتاپ، ەلىنىڭ وركەندەۋ جولىندا تابىستى قىزمەت ەتۋىنە تىلەكتەستىك ءبىلدىردى.
- ەلىڭىزدىڭ باياندى وركەندەۋىن جالعاستىرۋعا، دۇنيەجۇزىلىك قاۋىمداستىقتاعى بەدەلىن اسقاقتاتۋعا باعىتتالعان يگى ىستەرىڭىز بەن تىڭ باستامالارىڭىز ءاردايىم تابىستى بولۋىنا تىلەكتەسپىن. قازاقستان مەن كورەيا اراسىنداعى ءداستۇرلى دوستىق پەن ءوزارا قولداۋ رۋحىندا دامىپ جاتقان كەڭەيتىلگەن ستراتەگيالىق سەرىكتەستىگىمىزدى بۇگىننەن دە بيىك بەلەستەرگە كوتەرۋ ماقساتىندا سىزبەن كۇش-جىگەر جۇمىلدىرۋعا دايىن ەكەنىمدى راستايمىن، - دەپ جازىلعان قۇتتىقتاۋ حاتتا.
قاسىم-جومارت توقايەۆ يۋن سوك ەلدىڭ اسا جاۋاپتى قىزمەتىنە لايىم ساتتىلىك جانە دوستاس كورەي حالقىنا تولاسسىز قۇت-بەرەكە تىلەدى.