قازاقستان س ءى م باسشىسى رەسەيلىك زيۋگانوۆتىڭ مالىمدەمەسىنە قاتىستى پىكىر ءبىلدىردى

نۇر-سۇلتان. قازاقپارات - سىرتقى ىستەر ءمينيسترى مۇحتار تىلەۋبەردى رەسەيلىك دەپۋتات گەننادي زيۋگانوۆتىڭ قازاقستاننىڭ سولتۇستىك ايماقتارى تۋرالى مالىمدەمەسىنەن كەيىن قازاقستان نەگە نارازىلىق بىلدىرمەيتىنىن ءتۇسىندىردى.

«رەسمي نارازىلىق بولمايدى. ءبىز زيۋگانوۆ رەسەي فەدەراتسياسىنىڭ كوممۋنيستىك پارتياسىنىڭ كوشباسشىسى ەكەنىنە سۇيەنەمىز. ول قازىرگى ۇكىمەتكە وپپوزيتسيالىق پارتيا رەتىندە تانىلعان. وپپوزيتسيا ءارقاشان قازىرگى بيلىكتىڭ رەسمي ۇستانىمىنان بولەك نەمەسە ءتىپتى قايشى كەلەتىن سول نەمەسە باسقا پىكىردى ۇستانادى. زيۋگانوۆتىڭ ءسوزىن رەسەيدىڭ فەدەرال ارنالارىنىڭ ەشقايسىسى كورسەتكەن جوق. پرەزيدەنتىمىزدىڭ ماسكەۋگە جۇمىس ساپارى بارىسىندا رەسەيدىڭ قازاقستانعا اۋماقتىق تالاپتارى جوق ەكەنى جوعارى دەڭگەيدە راستالدى»، - دەدى تىلەۋبەردى ۇكىمەت وتىرىسىنان كەيىن جۋرناليستەردىڭ ساۋالدارىنا جاۋاپ بەرىپ.

ول رەسەي كوممۋنيستىك پارتياسى ك س ر و كوممۋنيستىك پارتياسىنىڭ ءىز باسۋشىسى جانە سول يدەولوگياعا نەگىزدەلگەنىن، ياعني ول دۇنيەجۇزىلىك سوتسياليستىك رەۆوليۋتسيانى جۇزەگە اسىرۋدى جانە بۇكىل الەمدە پرولەتاريات ديكتاتۋراسىن ورناتۋ ماقساتىن كوزدەيتىنىن ايتتى.

«نازارىڭىزدى بۇل ۆيدەو 2 اي وتكەن سوڭ پايدا بولعانىنا اۋدارعىم كەلەدى. بۇل ۆيدەونىڭ ۋكرايناداعى وقيعالار كەزىندە پايدا بولۋى كەزدەيسوق ەمەس. قارۋلى اسكەري قاقتىعىس اقپاراتتىق كەڭىستىكتەگى كۇرەستىڭ شيەلەنىسۋىمەن قاتار جۇرەتىنىن جانە قازاقستاننىڭ اقپاراتتىق كەڭىستىگىن قامتيتىنىن ءتۇسىنۋ كەرەك.

بەلگىلى بىرەۋلەر مەن ارانداتۋشىلىقتارعا قارسى ارەكەتتى وزدەرىڭىز، جۋرناليستەر ەسكەرۋى كەرەك ەكەنىن ءتۇسىنۋىڭىز كەرەك. سىزدەر بۇل ۆيدەو نەگە بۇرىن ەمەس، قازىر شىققانىن انىقتاۋىڭىز كەرەك. ونى كىم جاريالادى جانە ت. ب. «، - دەپ قوستى مينيستر.

Tengrinews.kz