رەسەيدە دوللاردىڭ قولما- قول اينالىمىنا تىيىم سالىنۋى مۇمكىن
وتاندىق ەكونوميست ساراپشىلار وسىلاي دەپ وتىر. بۇل وزگەرىس قازاقستاننىڭ ەكونوميكاسىنا دا كەرى اسەرىن تيگىزەدى. ۇلتتىق بانك ءتيىستى شارالار قابىلداماسا، ءتول تەڭگەمىز قۇلدىراپ كەتەدى. ءبىزدىڭ ەلدە دوللار مەن ەۋرونى شوتتان شەشىپ الۋعا تىيىم سالىنا ما جوق پا بەلگىسىز. ازىرگە ۇلتتىق بانك بۇل ماسەلە جايىندا اقپارات جاريالاعان جوق.
ارمان بەيسەمبايەۆ، قارجى ساراپشىسى:
- ەگەر رەسەيدەگى احۋال تاعى كۇردەلەنسە، ۆاليۋتا ايىرباستاۋعا شەكتەۋ قويىلادى. جاقىن ارادا جەرگىلىكتى حالىقتى ۆاليۋتانى رۋبلگە اۋىستىرۋعا ماجبۇرلەي باستاسا، تاڭ قالمايمىز. ياعني جەكە جانە زاڭدى تۇلعالار دوللاردى پايدالانا المايدى.
وكىنىشكە قاراي، ءبىزدىڭ ەل دە وسىنداي شەشىمگە كەلۋى مۇمكىن. ارمان بەيسەمبايەۆتىڭ پىكىرىنشە، جاعداي ۋشىقسا، قازاقستاندا بازالىق مولشەرلەمەنى كوتەرۋگە تۋرا كەلەدى. رەسەيدە بۇل كورسەتكىش قازىر 20 پروتسەنتكە تەڭ. ءبىراق بازالىق مولشەرلەمە ۇلعايسا، حالىققا نەسيە بەرۋ توقتاپ قالادى. ونى بولدىرماۋ ءۇشىن، كورشى ەل ازاماتتارىنىڭ ءوز قاراجاتىن بىزگە كەلىپ ايىرباستاۋىنا شەكتەۋ قويعان ءجون.
ارمان بەيسەمبايەۆ، قارجى ساراپشىسى:
- جاعداي وتە قاۋىپتى. قازىردىڭ وزىندە رۋبل مەن تەڭگە اراسىندا ايتارلىقتاي ايىرما بار. رەسەيلىكتەرگە قازاقستاننان دوللار ساتىپ الۋ ءتيىمدى بولىپ تۇر. ماسەلەن قازىر ءبىر دوللار 130 رۋبلگە تەڭ. ەگەر رۋبل 5 تەڭگە تۇرسا، ۇلتتىق ۆاليۋتامىز 650 تەڭگەنى قۇراۋى ءتيىس. ءبىراق ازىرگە ءبىر دوللار 520 تەڭگە شاماسىندا. سونى پايدالانعىسى كەلەتىندەر جەتەرلىك. وعان جول بەرۋگە بولمايدى.
www.24.kz