تويدا بيلەپ، ونەر كورسەتكەن ەر ادام جەلى قولدانۋشىلارىن ءتانتى ەتتى
ۆيدەوداعى ەر ادام - الماتى تۇرعىنى مۇحتار ايتبەكتەگى ەسىمدى ازامات بولىپ شىقتى. جاسى 46-دا. جەلى قولدانۋشىلارى ونى ءانشى داستان ورازبەكوۆكە ۇقساتقان.
«كوڭىلىن كوتەرىپ بيلەگەندە تۇرعان ەشتەڭەسى جوق، جاراسىپ تۇر»، «ءبىراز جاسقا كەلىپ، وسىلاي قيمىل جاساپ تۇر، دىم دا ەرسى ەمەس، قىزىعىپ وتىرمىن»، «داستان ورازبەكوۆكە ۇقساتتىم، جارايسىز»، - دەيدى جەلى قولدانۋشىلارى.
مۇحتار ايتبەكتەگىنىڭ ايتۋىنشا، جەلىدە تاراعان ۆيدەو قاپشاعايدا تۋىستارىنىڭ ءبىرىنىڭ تويىندا تۇسىرىلگەن.
«بۇل ۆيدەو قاپشاعاي قالاسىندا جەڭگەمنىڭ 50 جىلدىق مەرەيتويىندا تۇسىرىلگەن. سول تويعا اتا- انامدى اپارعام. كەيىن اعا-جەڭگەم «ءبىر بيلەپ بەرشى« دەپ قولقا سالدى، كوڭىلدەرىن قالدىرمايىن دەپ بيلەپ بەردىم. ءبىراق جەلىگە كىم سالعانىن بىلمەيمىن»، - دەدى ول.
مۇحتار ءبيدى جاقسى كورەتىنى سونشالىق، كەز كەلگەن اۋەنگە بيلەي بەرەتىنىن ايتتى.
«جاس كەزدە اۋىلدا جۇرگەندە «كار- مەن« توبى مەن مايكل دجەكسون كۋميرىم بولدى. شىنىمدى ايتسام، ءبيدى قاتتى جاقسى كورەم، كەز كەلگەن مۋزىكاعا بيلەي بەرەم. ىرعاقتى ۇستاساڭ بولدى، بي ءوزى شىعا بەرەدى. تارازدا 18 جاسىمدا بيگە ەلىكتەدىم، كەيىن اسكەري ومىرگە بەت بۇردىم. 2 اي عانا بيگە قاتىستىم»، - دەدى ول.
مۇحتاردىڭ ايتۋىنشا، كاسىبي تۇردە بيمەن اينالىسىپ كورمەگەن. ءوزىن داستان ورازبەكوۆكە ۇقساتقان جەلى قولدانۋشىلارىنا ونىڭ ونەرى ۇنايتىنىن، ءبىراق ەلىكتەمەگەنىن ايتتى.
«ءبي دەگەن سپورتتىڭ ءبىر ءتۇرى دەۋگە دە بولادى. بيلەر الدىندا دەنەنى قىزدىرىپ، جاتتىعىپ الۋ كەرەك. بيلەسەڭ كوڭىلىڭ دە كوتەرىلەدى عوي. داستان ءىنىمىزدىڭ ءبيى ۇنايدى. وتە كەرەمەت قيمىلدار ىستەيدى»، - دەدى ول.
مۇحتار - ۇلتتىق ۇلاننىڭ زەينەتكەرى. 22 جىل وسى سالادا قىزمەت ەتكەن. ونىڭ بيگە دەگەن قىزىعۋشىلىعى ك ۆ ن ويناعان كەزىندە دە كورىنگەن.
«ك ۆ ن وينادىم. 1998 -جىلى الماتىدا جوعارى ءبىلىم بەرەتىن ينستيتۋتتارمەن ويناپ، ىشكى اسكەر كومانداسى بولىپ 1-ورىن الدىق. قويىلىم كەزىندە ءبي جاعى مەنەن بولاتىن»، - دەپ كۇلىپ ەسكە الدى ول.