الاش قىزى عارىشقا قاشان ۇشادى؟
ازىرشە ءبىزدىڭ ەلگە باعىنباي تۇرعان بەلەستىڭ ءبىرى - قايسار قىزدارىمىزدىڭ عارىشقا جول سالا الماي جۇرگەنى. ءبىزدىڭ بۇرىمدىلار ءۇشىن عارىشتىڭ شىنىمەن الىس بولعانى ما؟
ءسال شەگىنىس جاساپ، 2015 -جىلدىڭ قىركۇيەگىنە ورالايىقشى. وتانداسىمىز ايدىن ايىمبەتوۆ عارىشتان ورالعان سوڭ، «قازاقستاننان ۇشاتىن كەلەسى عارىشكەر ايەل بولماق» دەگەن اڭگىمە تارادى. سودان بەرى دە جەتى جىل ءوتىپتى. ءبىراق ءسۇيىنشى حاباردىڭ اۋىلى ءالى الىس سەكىلدى مە، قالاي.. .
شىنىندا دا، قازاق قىزىنىڭ عارىشقا ۇشۋى ايتۋلى وقيعا بولار ەدى. قيىن- قىستاۋ كەزەڭدە- اق اسپان كوگىن باعىندىرعان حيۋاز دوسپانوۆاداي ۇشقىشتىڭ سىڭلىلەرى ءۇشىن عارىش كوگىنە كوتەرىلۋ اسا ءبىر قيىندىق تۋدىرماسا كەرەك. «قازاقستان عارىش ساپارى» ۇلتتىق كومپانياسىنىڭ باسقارما ءتوراعاسى، عارىشكەر ايدىن ايىمبەتوۆ تە ءدال وسى پىكىرمەن تولىقتاي كەلىسەتىنىن ايتتى.
- قازاق قىزدارىنىڭ عارىشقا ۇشار كۇنى الىس ەمەس. ولاردىڭ دەنە دايىندىعى، ءبىلىم- عىلىم تۇرعىسىنان ازىرلىگى وتە جوعارى دەڭگەيدە. جىگىتتەردەن استە كەم ەمەس. سوندىقتان بولاشاقتا ءبىزدىڭ ەلدەن ايەل عارىشكەرلەر شىعارىنا سەنىمدىمىن. وسى جولدى تاڭداپ، دايىندىق ۇستىندە جۇرگەن بۇرىمدىلار بارشىلىق. قازىرگى بالالاردىڭ دا عارىشقا دەگەن قىزىعۋشىلىعى جوعارى. ماسەلەن، ەلورداداعى وقۋشىلار سارايىندا جاس عارىشكەرلەر مەكتەبى بار. مەكتەپكە جازىلعانداردىڭ ىشىندە وقۋشى قىزدار دا بار. بولاشاق عارىشكەر قىزدارىمىز الگى مەكتەپتە دە جۇرگەن شىعار، كىم ءبىلسىن، - دەدى ايدىن ايىمبەتوۆ.
وكىنىشكە قاراي، «قازاقستان عارىش ساپارىنىڭ» باسشىسى «ولار كىمدەر؟ ەسىمدەرىن اتاۋعا بولا ما؟» ، «ناقتى قاشان ۇشادى؟» دەگەن ساۋالدارىمىزدى جاۋاپسىز قالدىردى. ءسىرا، ارىق ايتىپ، سەمىز شىققىسى كەلەتىن سەكىلدى. ونىڭ ۇستىنە عارىش جابىق ءھام قۇپيا سالا عوي. سوندىقتان مۇنداعى جاڭالىقتىڭ ءبارىن جارقىراتىپ جايىپ تاستاۋعا بولمايدى.
قازاقتان شىققان تۇڭعىش عارىشكەر توقتار اۋباۋكىروۆ تە بولاشاقتا قازاق قىزدارىنىڭ عارىشقا ۇشارىنا سەنىمدى.
- عارىشقا تەكتەن- تەك ۇشپايدى. نەگىزگى ماقسات - عىلىمعا ۇلەس قوسۋ. دەمەك، وسى جولدا جۇرگەن قىزدارىمىزدىڭ عارىشقا ۇشاتىن مۇمكىندىگى بار. عارىشكەر ناقتى عىلىمي باعداردى ۇستانىپ بارىپ ۇشۋى كەرەك. ونىڭ عارىش كوگىن باعىندىرۋى جاي عانا ابىروي ەمەس، ەلدىڭ ونەركاسىبى مەن اۋىل شارۋاشىلىعى سالاسىنداعى ماسەلەلەردى شەشەتىن ءتيىمدى قادام بولۋعا ءتيىس. ايەلدەر قاۋىمىنىڭ عىلىمدا جوعارى جەتىستىكتەرگە جەتىپ جۇرگەنى، ولاردىڭ تاپسىرىلعان شارۋاعا اسا جاۋاپكەرشىلىكپەن قارايتىنىن ەسكەرسەك، قازاق قىزدارىنا دا كەزەك كەلەدى ءالى، - دەيدى توقتار اۋباكىروۆ.
ايەل عارىشكەرلەر تۋرالى اڭگىمە قوزعالسا كوپشىلىكتىڭ ويىنا ۆالەنتينا تەرەشكوۆا مەن سۆەتلانا ساۆيتسكايا ورالادى. ءبىراق 2021 -جىلدىڭ سوڭىنداعى دەرەك بويىنشا الەمدە 68 ايەل عارىشتى باعىندىرعان.
ءدال قازىرگى ۋاقىتتا قىتايلىق ۆان ياپين مەن امەريكالىق كەيلا بەررون عارىشتاعى ساپارلارىن ءالى جالعاستىرۋدا. العاشقىسى وتكەن جىلدىڭ 15-قازانىندا، سوڭعىسى 11-قاراشادا جولعا شىققان.
قازىرگى ۋاقىتقا دەيىن 9 مەملەكەتتىڭ قىزدارى عارىشقا ۇشقان. ماسەلەن، 68 ايەل عارىشكەردىڭ 53 ءى امەريكالىق. بەسەۋى – ك س ر و/رەسەي وكىلى. كانادا، جاپونيا جانە قىتاي عارىشقا ەكى ايەل عارىشكەردى اتتاندىرعان. ۇلى بريتانيا، فرانسيا، يتاليا جانە وڭتۇستىك كورەيا ءبىر- ءبىر وكىلىن عارىش كوگىنە جىبەرگەن.
عارىشتى يگەرگەن ساناۋلى ەلدەردىڭ قاتارىنداعى قازاقستاننان ايەل عارىشكەرلەردىڭ شىعارىنا الەم سەنەدى. ءبىزدىڭ دە كۇمانىمىز جوق. ءبىر قولىمەن بەسىكتى، ءبىر قولىمەن الەمدى تەربەتەتىن قازاق قىزدارىنا عارىشقا سامعايتىن كۇن دە الىس ەمەس!
فارحات قايرات ۇلى
egemen.kz