ۋكرايناداعى احۋال: رەسەي تىنىشتىق رەجيمىن نە ءۇشىن جاريالادى
بىرنەشە كۇنگە جوسپارلانعان رەجيم گۋمانيتارلىق ءدالىز ۇيىمداستىرۋ ءۇشىن قاجەت. وسى ۋاقىت ىشىندە ماريۋپول جانە ۆولنوۆاحا قالالارىنان تۇرعىندار ەۆاكۋاتسيالانۋى ءتيىس. ال قالادا قالۋ تۋرالى شەشىم قابىلداعاندارعا گۋمانيتارلىق جۇك جەتكىزىلەدى. الايدا تاراپتار تىنىشتىق رەجيمىن بۇزدى دەپ ءبىرىن- ءبىرى ايىپتاپ ۇلگەردى.
گۋمانيتارلىق ءدالىز اشۋ تۋرالى شەشىم 2 كۇن بۇرىن ۋكراينا مەن رەسەي دەلەگاتسيالارى اراسىندا وتكەن كەلىسسوزدەردىڭ ەكىنشى كەزەڭىندە قابىلدانعان. حالىقتى كوشىرۋ جۇمىستارى مۋنيتسيپالدىق اۆتوبۋستارعا جۇكتەلدى. تاڭعى 9 بەن كۇندىزگى 4 ارالىعىندا تۇرعىندار جەكە كولىكپەن دە جولعا شىعا الادى. گۋمانيتارلىق ءدالىز باعىتىنان اۋىتقۋعا قاتاڭ تىيىم سالىنادى.
ۋكراينا بيلىگى ماريۋپولدەن گۋمانيتارلىق ءدالىز ارقىلى 200 مىڭنان اسا ادام، ال ۆولنوۆاحا قالاسىنان 15 مىڭ ادام ەۆاكۋاتسيالانۋى ءتيىس ەكەنىن حابارلادى. ولاردىڭ بارلىعى زاپوروجەگە جەتكىزىلەدى. بۇدان بولەك، ءدالىز ارقىلى اتالعان ەلدى مەكەندەرگە گۋمانيتارلىق جۇكتەر تاسىمالدانادى. وق اتپاۋ ءتارتىبىنىڭ ساقتالۋىن حالىقارالىق قىزىل كرەست ۇيىمى قامتاماسىز ەتەدى.
يگور كوناشەنكوۆ، ر ف قورعانىس مينيسترلىگىنىڭ رەسمي وكىلى:
- بۇگىن ماسكەۋ ۋاقىتىمەن تاڭعى 10-نان باستاپ رەسەي تارابى وق اتپاۋ ءتارتىبىن جاريالادى. وسىعان سايكەس ماريۋپول مەن ۆولنوۆاحادان بەيبىت تۇرعىنداردىڭ ەۆاكۋاتسياسى ءۇشىن گۋمانيتارلىق دالىزدەر اشىلدى. ونىڭ باعدارى ۋكراينا جاعىمەن الدىن الا كەلىسىلگەن.
دەسە دە ءوزىن ءوزى جاريالاعان دونەتسك حالىق رەسپۋبليكاسىنىڭ باسشىسى دەنيس پۋشيلين گۋمانيتارلىق ءدالىزدىڭ جۇمىس ىستەمەي تۇرعانىن حابارلادى. سەبەبى ماريۋپولدەن بۇگىن ەشكىم شىققان جوق دەيدى. ۋكراينا ۇكىمەتى بۇعان رەسەي تارابىن كىنالاپ وتىر.
يرينا ۆەرەشۋك، ۋكراينانىڭ ۋاقىتشا باسىپ الىنعان اۋماقتاردى رەينتەگراتسيالاۋ جونىندەگى ءمينيسترى:
- ءبىزدىڭ جاۋىنگەرلەردەن رەسەي اسكەرى وق اتۋ ءتارتىبىن پايدالانىپ، العا قاراي جىلجىپ بارادى دەگەن حابار كەلىپ ءتۇسىپ جاتىر. ول باعدار بويىنشا اسكەر قوزعالماۋى كەرەك. ءدالىز بەيبىت تۇرعىنداردى ەۆاكۋاتسيالاپ، قالادا قالعان باسقا ازاماتتارعا گۋمانيتارلىق جۇك جەتكىزۋ ءۇشىن پايدالانىلۋى ءتيىس.
جالپى، ب ۇ ۇ- نىڭ مالىمدەۋىنشە، شيەلەنىس باستالعالى ۋكراينادان ءبىر ميلليون 200 مىڭ ادام جان- جاققا بوسىپ كەتكەن. ولاردىڭ جارتىسىنا جۋىعى - بالالار. ساراپشىلاردىڭ پايىمداۋىنشا، جاقىن كۇندەرى ەلدەن قونىس اۋدارعاندار سانى 4 ميلليونعا جەتۋى مۇمكىن. ۆلاديمير زەلەنسكي كەزەكتى ۇندەۋىندە ۋكراينادان كەتكەندەردىڭ بارلىعى جاقىن ارادا ۇيلەرىنە قايتا ورالاتىنىنا ءسوز بەردى.