سامسۋنگ كومپانياسىنىڭ تاريحى: بۋردج-حاليفانىڭ شىڭىنا دەيىن

استانا. قازاقپارات - Samsung كومپانياسى تۋرالى ەستىمەگەن ادامزات بالاسى از شىعار، ءسىرا. بۇگىندە جەر بەتىندەگى حالىقتىڭ باسىم بولىگى وسى كومپانيانىڭ گادجەت، تەلەديدار، توڭازتقىش، شاڭسورعىش، كىر جۋعىش ماشينا، پلانشەت، سمارتفون سياقتى ونىمدەرىن تۇتىنادى.

ءتىپتى، ادامدار بۇل قۇرالدارسىز وزدەرىنىڭ كۇندەرىن ەلەستەتە المايتىن دارەجەگە جەتكەن.

ءبارى بىردەي بىلە بەرمەۋى مۇمكىن، Samsung كومپانياسى ەجەلگى كارىس برەندتەرىنىڭ ءبىرى. كومپانيا تاريحى الپاۋىت ەۋروپالىق جانە امەريكالىق كومپانيالارمەن سالىستىرعاندا، تىم تەرەڭدە جاتىر.

ءبىز بۇگىنگى ماتەريالىمىزدا Samsung كومپانياسىنىڭ ىشكى جاعدايىن، الپاۋىت كارىس كومپانياسىنىڭ قاشان دۇنيەگە كەلگەنىن، قالاي جەتىستىككە جەتكەنىن، بولاشاققا قانداي جوسپارلار جاساپ وتىرعانىن وقىرمانىمىزعا تولىقتاي جەتكىزۋگە تىرىسامىز.

كومپانيانىڭ قۇرىلۋى جانە نارىقتاعى العاشقى جىلدار

وڭتۇستىك كورەيادا ورنالاسقان كىشىگىرىم تەگۋ قالاشىعى. 1938 -جىل، كوكتەمنىڭ العاشقى كۇنى. كۇرىش ساتۋمەن اينالىساتىن جەرگىلىكتى كاسىپكەرلەردىڭ ءبىرى لي بەن چحول ءوزىنىڭ كىشكەنە كاسىبىن كەڭەيتۋ ماقساتىندا سەرىكتەستەرىمەن بىرگە جاڭا كومپانيانىڭ نەگىزىن قالايدى.

تەگۋ. 1938 -جىل. تاعى دا سول Samsung Group نەگىزى قالانعان ساۋدا لاشىعى

سەرىكتەستەردىڭ ورتالاي جيناعان 2000 دوللار قاراجاتىمەن كومپانيانىڭ تاريحى باستالدى. ولار، الدىمەن، تەلەكوممۋنيكاتسيالىق قۇرىلعىلار (اۋديو جانە ۆيدەو قۇرىلعىلار) شىعارۋمەن جانە باسقا دا تۇرمىستىق قاجەتتىلىكتەردى وندىرۋمەن اينالىستى.

كومپانيانىڭ اتاۋى كارىس تىلىندە «سامسون» دەپ اتالادى جانە بۇل قازاقشاعا ءتارجىمالاساق، «ءۇش جۇلدىز» دەگەن ماعىنا بەرەدى. كوپشىلىكتىڭ ايتۋىنشا، بۇل اتاۋ كومپانيانىڭ نەگىزىن قااۋشىنىڭ ءۇش ۇلىنىڭ قۇرمەتىنە قويىلعان.

بارلىعى كىشى ساۋدادان باستالدى. ءسىز تاڭ قالماڭىز!

Samsung كومپانياسى العاشىندا قانت، لاپشا، كۇرىش جانە كەپتىرىلگەن بالىق سىندى ازىق-تۇلىك ونىمدەرىن ەكسپورتتاۋمەن اينالىسقان. ارادا جىل وتكەننەن كەيىن كومپانيا سىرا قايناتاتىن زاۋىت اشۋعا قاۋقارلى بولدى. زاۋىت كۇرىش اراعى جانە ۆينو سەكىلدى الكوگولدى ونىمدەردى نارىققا شىعارىپ، سودان قاراجات تۇسىرە باستادى. كومپانيا ەكىنشى دۇنيەجۇزىلىك سوعىس كەزەڭىندە دە ەشقانداي زارداپ شەككەن جوق، ەسەسىنە نىعايا ءتۇستى.

سوعىس اقتالعاننان كەيىن كومپانيانىڭ ءونىم اسسورتيمەنتى تىگىن ماشينالارىمەن، بولاتپەن جانە تىڭايتقىشپەن تولىقتى. ال 1948 -جىلى امەريكالىق ۇلگىدەگى Samsung Trading Co اتاۋىن الدى.

كارىس سوعىسى جانە كاسىپتىڭ قۇلدىراۋى

لي بەن چحول ۇلكەن جوسپارلارمەن ءجۇرىپ كەلە جاتىر ەدى. ونىڭ ەڭ ءبىرىنشى ماقساتى - امەريكالىق نارىقتى «ۇستاپ» الۋ ەدى. ءبىراق كاسىپتى 1950-53 -جىلدارى ورىن العان كورەياداعى سوعىس قۇلدىراتىپ كەتتى.

كارىس سوعىسى كومپانيا جانە ونىڭ يەسى ءۇشىن اۋىر سىناقتاردىڭ ءبىرى بولدى. كۇرىش قورى، بارلىق قويمالار، كومپانيانىڭ وفيسىنە دەيىن وتقا وراندى. تەك ءبىر عانا جاشىك قولدا قالدى. لي بەن چحول الداعى ۋاقىتتى شەبەر بولجاپ، ءبىراز قاراجاتتى وسى جاشىككە سالىپ ساقتاعان ەكەن.

لي بەن چحول توقىما فابريكاسىن اشتى. سونىمەن قاتار، جوعارى ورلەۋ ءۇشىن قانت وندىرۋمەن جانە ساقتاندىرۋ قىزمەتىمەن اينالىستى. مىنە، ول وسىلايشا 60- جىلدارى كورەيانىڭ قۇرمەتتى كاسىپكەرىنە اينالدى.

ورلەۋ جانە قۇلدىراۋ، قۇلدىراۋ جانە ورلەۋ (بۋردج-حاليفانىڭ شىڭىنا دەيىن)

ەلدە باستالعان رەۆوليۋتسيا كومپانيا جۇمىسىنا دا ءوز زالالىن تيگىزبەي قويمادى. لي بەن چحول تۇرمەگە وتىرعىزىلىپ، ونىڭ مۇلكى تاركىلەندى. ءبىراق بۇل بارلىعىنىڭ سوڭى ەمەس ەدى. جاڭا بيلىك باسىنا پاك چون حي كەلگەننەن كەيىن ول ەكونوميكالىق رەفورمالار جاساپ، تۇرمەدە جاتقان تالانتتى كاسىپكەردى ەسىنە الادى.

ونى تەك قانا بوساتىپ قويماي، وعان كاسىپپەن اينالىسۋعا رۇقسات بەردى. سونداي-اق، ونى مەملەكەتتىك نەسيەلەردى بەرۋ ارقىلى قولداپ وتىردى. ال لي بەن چحول بۇل جولى جاڭا كاسىبىن زاماناۋي سۇرانىستاردى قاماتاماسىز ەتەتىن ەلەكترونيكا باعىتىندا باستادى. وسى ۋاقىتتا، 1969 -جىلى، كومپانيانىڭ اعىلشىن تىلىندەگى العاشقى لوگوتيپى جاسالدى.

1969-1979 -جىلدارداعى كومپانيا لوگوتيپى

ەلەكترونيكامەن قاتار Samsung كومپانياسى ساقتاندىرۋ ىسىمەن، باسپا ىسىمەن، سونداي- اق، ۋنيۆەرسيتەت، اۋرۋحانا، قوناق ءۇي، ءتىپتى، كەمە جاساۋمەن اينالىستى.

سىزدەردىڭ بىلمەۋلەرىڭىز مۇمكىن. الەمدەگى ەڭ بيىك عيمارات سانالاتىن ب ا ءا-دەگى بۋردج-حاليفا مۇناراسى Samsung Engineering قۇرىلىسشىلارىنىڭ قولىنان تۇرعىزىلعان.

سونىمەن قاتار، مالايزياداعى پەتروناس ەگىز مۇناراسى دا وسى كومپانيانىڭ قولىنان شىققان كەرەمەتتەر قاتارىنا جاتقىزىلادى.

ۋاقىتىندا الەمدەگى ەڭ ۇلكەن كەمە دەپ ەسەپتەلگەن Prelude FLNG تانكەرى دە Samsung Heavy Industry كومپانياسى ءبولىمىنىڭ جەتىستىگى. تانكەردىڭ ۇزىندىعى 500 مەتردى قۇرايدى.

Samsung تەحنولوگيالىق كومپانياسىنىڭ تاريحى 1970 -جىلى جارىققا شىققان اق-قارا ءتۇستى تەلەديداردان باستالادى. بۇل Sanyo مەن بىرىگىپ جاسالعان جۇمىس ەدى. ءبىراق بىرنەشە جىل وتكەننەن كەيىن سەرىكتەستىكپەن جاسالعان جۇمىس بولاشاق Samsung Electronics-تىڭ، ياعني، Samsung Trading Co كومپانياسىنىڭ قۇرامىنا كىرەدى.

ارادا كوپ ۋاقىت وتپەي 1977 -جىلى Samsung كومپانياسى العاشقى ءتۇرلى-ءتۇستى تەلەديداردى جاساپ شىعاردى. ال ون جىلدان كەيىن كومپانيا 10 ميلليون ءتۇستى تەلەديداردىڭ جارىققا شىعۋىن تويلادى. ساندىق تەلەديدارلار 1998 -جىلدان باستاپ اۋقىمدى تۇردە شىعارىلا باستادى. وسىدان كەيىن جۇقا مونيتورلار مەن ەكراندار سانگە اينالدى. كومپانيا مونيتور جاساۋدان سول ارالىقتا الدىنا جان سالمادى.

1999 -جىلى كومپانيانى Forbes Global بەدەلدى باسپا ءسوزى «تۇرمىستىق تەحنيكا وندىرۋدەن ۇزدىك كومپانيا» اتتى اتاقپەن ماراپاتتادى.

مىنە، ارادا بىرراز جىل ءوتتى. ءبىراق كورەيالىق كومپانيا تۇرمىستىق تەحنيكا، گادجەتتەر، سمارتفوندار، كومپيۋتەرلەر وندىرۋدەن الدىڭعى قاتاردا كورىنۋدەن جالىقپاۋدا.

بۇل - ۇزدىكسىز ۇدەرىس، ۇزدىكسىز دامۋ.

اۆتور : ادىلەت مادەنيەت

qamshy.kz