ۆيتسە-پرەمەر كينولاردىڭ قازاق تىلىندەگى اۋدارماسىن سىنعا الدى

نۇر-سۇلتان. قازاقپارات - بۇگىن قازاقستان رەسپۋبليكاسى پرەمەر- ءمينيسترىنىڭ ورىنباسارى ەرالى توعجانوۆتىڭ توراعالىعىمەن حالىقارالىق «قازاق ءتىلى» قوعامىنا قولداۋ كورسەتۋ جانە مەملەكەتتىك ءتىلدى دامىتۋ ماسەلەلەرى جونىندە جينالىس ءوتتى.

قازاقپارات بۇل تۋرالى primeminister.kz سايتىنا سىلتەمە جاساپ حابارلايدى.

كەڭەسكە مۇددەلى مەملەكەتتىك ورگانداردىڭ جانە جەرگىلىكتى اكىمدىكتەردىڭ جاۋاپتى وكىلدەرى قاتىستى. جينالىستا ق ر ءبىلىم جانە عىلىم ءمينيسترىنىڭ ءبىرىنشى ورىنباسارى شولپان كارينوۆا مەملەكەتتىك ءتىلدى دامىتۋ رەفورماسىنىڭ ىسكە اسىرىلۋ بارىسىن باياندادى. 2021 -جىلى «ۇلتتىق رۋحاني جاڭعىرۋ» ۇلتتىق جوباسى اياسىندا پۋبليتسيستيكالىق ماتىندەردىڭ 2 ميلليون بىرلىگىنە تالداۋ جاسالىپ، ارنايى سايت - qazcorpora.kz سايتىنا ورنالاستىرىلدى.

2022 -جىلدان باستاپ جىل سايىن ءسوزقولدانىس سانىن 10 ميلليون ارتتىرىپ، 2025 -جىلى قازاق ءتىلىنىڭ ۇلتتىق كورپۋسىنداعى ءسوزقولدانىستار سانىن 40 ميلليون جەتكىزۋ جوسپارلانىپ وتىر. باقىلاۋ جۇرگىزۋ تۋرالى ءبىلىم جانە عىلىم ءمينيسترىنىڭ 2021 -جىلعى 3-جەلتوقسانداعى №580-بۇيرىعىمەن 41 (مەملەكەتتىك ورگان) تەكسەرۋ وبەكتىسى بەكىتىلدى، ونىڭ ىشىندە: 21 ورتالىق اتقارۋشى جانە 20 جەرگىلىكتى اتقارۋشى ورگان. سونداي-اق 2021 -جىلى 180 مەكەمەنىڭ رەسمي سايتىنا مونيتورينگ جۇرگىزىلدى. وسى مونيتورينگىنىڭ قورىتىندىسى بويىنشا 197 ەسكەرتۋ حاتتارى جولدانىپ، 89 مەكەمە تۇزەتۋلەر ەنگىزدى.

ۆيتسە-پرەمەر ە. توعجانوۆ سوڭعى جىلدارى مەملەكەتتىك ءتىل ماسەلەسىن كوتەرىپ جۇرگەن ازاماتتار مەن باستاماشىل توپتار قاتارى ارتىپ كەلە جاتقانىن اتاپ ءوتتى. بۇل باعىتتاعى ماسەلەلەردى شەشۋ ءۇشىن ءتيىستى مەملەكەتتىك ورگاندارعا ناقتى تاپسىرمالار بەردى.

اتاپ ايتقاندا، جاڭا ءارى كوپشىلىككە قىزىقتى كونتەنتتى قالىپتاستىرۋ ءۇشىن ساپالى اۋدارماشى ماماندار پۋلىن قالىپتاستىرۋدى جۇكتەدى. ءتىلدى ۇيرەتۋگە كومەكتەسەتىن، قولايلى قوسىمشالاردى دامىتۋدىڭ ماڭىزدىلىعىن ەسكەرە وتىرىپ، اعىلشىن ءتىلىن ۇيرەتۋگە ارنالعان قوسىمشالاردى جان- جاقتى زەردەلەۋدى تاپسىردى.

ەرالى توعجانوۆ كينولاردىڭ قازاق تىلىندەگى اۋدارمالارىن سىنعا الىپ، قازاقشا مۋلتفيلمدەردىڭ دە ساپاسىن ارتتىرۋ قاجەتتىگىن ايتتى.

مەملەكەت باسشىسىنىڭ 2021 -جىلعى قازاقستان حالقىنا جولداۋىندا ايتىلعان تاپسىرمانى ىسكە اسىرۋ ءۇشىن ۇكىمەت باسشىسىنىڭ ورىنباسارى جاڭا قازاقستاندىق مادەنيەتتى قالىپتاستىرۋ جونىندەگى شارالار جوسپارى اياسىندا قازاق تىلىندەگى تولىقمەتراجدى 2 مۋلتفيلم، 10 مۋلتسەريال، 10 بالالار تەلە- باعدارلاماسىن، 20 بالالار ادەبيەتى شىعارماسىن، 30 ساپالى اۋدارما ازىرلەۋ بويىنشا ۇسىنىستاردى پىسىقتاپ ەنگىزۋدى تاپسىردى.

سونىمەن قاتار بالالار ادەبيەتىن دامىتۋ اياسىندا قازاق تىلىندە جەڭىل تىلمەن جازىلعان شىعارمالاردىڭ بارلىق بالالار ءۇشىن قولجەتىمدى بولۋىن جانە مۇنداي شىعارمالاردى بالالار اراسىندا كەڭىنەن جارنامالاۋدىڭ ماڭىزدىلىعىن جەتكىزدى. مەملەكەتتىك قىزمەت ىستەرى اگەنتتىگىنە مەملەكەتتىك ورگانداردا جانە ۇلتتىق كومپانيالاردا مەملەكەتتىك ءتىلدىڭ قولدانىس اياسىن كەڭەيتۋ جونىندەگى ۇسىنىستاردى، كەڭەستەردىڭ قازاق تىلىندە ءوتۋى، قۇجاتتاردىڭ مەملەكەتتىك تىلدە دايىندالۋى بويىنشا كريتەريلەردى ەنگىزۋ جۇكتەلدى.

بۇگىنگى كۇنى «حالىقارالىق «قازاق ءتىلى قوعامى» قوعامدىق بىرلەستىگىنىڭ 15 وبلىستىق، 27 اۋداندىق فيليالى، 1663 باستاۋىش ۇيىمدارى بار. مەملەكەتىك ءتىلدى دامىتۋ اياسىندا وڭىرلەردە قازاق ءتىلى قوعامىنىڭ جاڭا فيليالدارىن قايتا قۇرۋ قاجەتتىلىگى اتاپ ءوتىلدى.